السلام عليكم و رحمة الله
هحكيلكو موقف بسيط كده حصل
اختى كانت عند دكتور العيون .. المهم قالها انها تغمض عينيها فترة
المهم اختى الصغيرة بتقول لماما
ماما هو لو أبلة ... (اختى) ساقت دلوقتى و هيا مغمضة ايه اللى يحصل؟
راح اخويا الجهبذ الصغير قايلها جملة مختصر للى هيحصل
دِش دِش دِش
جملة عجبتنى الصراحة و مختصرة
لو جينا نحلل الكلام ده
هو يعنى ايه انسان ماشى مغمض .. ايه الضرر يعنى؟
متهيألى الضرر الوحيد انه مش عارف هو رايح فين
و بالتالى هيحصل حاجة من 2
إما
دِش دِش دِش
أو
ان ربنا هيسترها و مايحصلش حاجة بس للاسف مش هنوصل للمكان اللى عاوزينه ولا لمكان اساساً
نيجى بقى فى حياتنا
لما نبقى ماشيين من غير هدف
يعنى مثلا
واحد بيذاكر .. بيذاكر ليه ؟؟
هو مش عارف
هو بيذاكر و خلاص
انما مافيش هدف أدامه .. هدف محدد يتحدى نفسه عشانه .. مش موجود للاسف
هييجى فى الاخر -غالبا- يسال نفسه انا استفدت ايه
غالبا مش بيحس بنتيجة او بفرحة النجاح -اذا نجح-
مع ان غيره ممكن يبقى نجاحه اقل منه بس فرحته بنجاحه اكبر
لانه عارف هو عاوز ايه
و عارف ان نجاحه ده لسة بداية للى بعد كده
واحد تانى بيدخل نت
ايه الهدف ؟؟
مش عارف
هو بيدخل و خلاص بلا هدف
الا كنوع من انواع قتل الوقت يمكن بس برده من غير هدف
فى الاخر
مش هيلاقى نفسه عمل حاجة
مع ان غيره استفاد من كل حاجة
واستخدم النت عشان يطور نفسه و يستفيد و جانب من الترفيه برده
بس حتى الترفيه لهدف
واحد تالت ماشى فى كل الاتجاهات
مرة شاعر
و مرة كاتب
و مرة محلل
و مرة شغلته الاساسية
و مرة ... و هكذا
ده شئ كويس جداااااااااا جدااااااااا ان يكون فى انسان كده
بس ياترى ايه الهدف ؟؟ ايه الهدف اللى يربط بين دول كلهم فى حياتك؟؟
لا شئ
اهى حاجات بتتعمل و خلاص
تمام جدا حاجات كويسة و ربنا يعينك عليها
بس هتيجى فى الاخر
محصلة الحاجات الكويسة دى كلها =صفر
لان مافيش مجموع للجهد اللى بتعمله
ولا فى اتجاه موحد لكل الاتجاهات دى
عارفين احنا لو ماحطناش هدف هنبقى عاملين زى ايه
زى المركب اللى سايب الموج يحركه
هو اه بيتحرك
بس للاسف مش عارف هو راح فين
و لا هيعرف يصطاد
و لا هيعرف يستمتع
ولا هيعرف مكان جديد
و لاهيكتشف مكان كويس فى البحر
ولا هيعرف يرجع لمكانه الاصلى عشان يبدأ من جديد
هيضطر انه يعمل بداية ليه من مكانه دلوقتى و يحاول من جديد و ربنا يعينه
لازم يا جماعة بالله عليكم
هدف اساسى نعيش بيه و ليه
تحته اهداف فرعية
تحتهم فرعيين اكتر
و هكذاااااا
عشان لو هدف من الاهداف الفرعية ماقدرناش نحققه و ده وارد جدا
نقدر نحط ليه بديل يساعنا فى الهدف الاساسى
حياتنا دى مش لعبة و مش هتتكرر
و لو جينا فى النهاية اكتشفنا اننا غلطنا فى حق نفسنا
مش هنرجع عشان نصلح
ديننا قال لازم يبقى فى نية فى العمل اللى بنعمله
و الا مش ليه لازمة
فين نيتك من حياتك؟
و نيتك من النت؟
و من الدراسة؟
و من طاعتك لوالديك؟
و من التزامك بالدين؟
و من عدم التزامك بالدين؟
و من لعبك؟
و من كلامك؟
و من علاقتك بالناس؟
و من زعلك من غيرك؟
و من حبك لغيرك؟
و من صداقاتك ؟
و من كل حاجة بتعملها فى حياتك؟؟؟؟؟؟؟
انا عارفة ان سنبة كبيرة هتقولى احنا كده مش هنستمتع مش كل حاجة تبقى محددة و مدروسة بالورقة و القلم
ولا احنا الة عشان نبقى محددين ده كله
كده مش هنخلص
امممممم اوك
مش ده كله
بس اللى تقدر عليه
و ع اد ما تحدد هدف فى كل حاجة فى حياتك
ع اد ما هتقدر تنجح فى حاجات كتير فى حياتك-بعد عون ربنا طبعا-
6 ضع بصمتك ..:
علشا ن كده قال تعالى :
{ قل إن صلاتي و نسكي و محياي و مماتي لله رب العالمين }
و من تلمح حلاوة العاقبة هانت عليه مشقة المسير ,
ربنا يهدينا لسبيله ,
جزاكم الله خيرا
"حياتنا دى مش لعبة و مش هتتكرر"
مظبوط جدا يا شموخ .. الواحد ان مكانش عارف هو رايح فين عمره ما هيوصل
لأنه هايوزع مجهوداته على حاجات كتيرة بدون هدف وهايبقا عامل زي المنبت لا أرضا قطع ولا ظهرا أبقى
جزاك الله خيرا
ويارب ميكونش فيه دش دش دش :)
جميلة اوي
TIMMY..
يارب ييسر لنا كلنا كل خير يارب
جزاك الله كل خير ع التعليق
سموالامير..
اها اكييد
انا فاكرة نكتة كان مدرب تنمية بشرية قالهالنا:
واحد ركب تاكسى و قال للسواق ودينى فى اى مكان و خد 1000 جنيه قاله انزل هنا و هاتهم !!
جزاك الله كل خير ع التعليق
غير معروف..
شكرا يا فندم ع تعليق حضرتك ..
إرسال تعليق