السلام عليكم و رحمة الله
كان اخر موضوع كتبته عن الهدف ..
بس فى سؤال
ليه بنبقى اوقات حاطين اهدافنا بس مابنفتكرهاش غير لما نقعد نقراها تانى او نبقى قاعدين لوحدنا و نفتكرها .. و نقول ياااااااااه ده احنا عندنا اهداف رائعة
مابنفتكرهاش ازاى بقى؟؟
يعنى انا ممكن يكون عندى هدف قوى جدا جدا
و فيه كل مواصفات الهدف(SMART)
بس و انا بتعامل مع زمايلى و مع الناس عادى بنسى ده او مش بنساه بس مش عايشاه
عارفين
زى اللى مسافر مكان و بعدين فى الطريق شاف حاجة بيخاف منها و انشغل بالحاجة دى و نسى المكان اللى هو عاوزه .. وضحت؟؟
عارفين ايه المشكلة يا جماعة -من رايى يعنى و هستنى رايكم-؟
نسبة كبيرة مننا محاطة بناس سواء زمايل او اصحاب او معارف مالهمش هدف .. فكلامهم او ضحكهم او اى حاجة بتنسيك هدفك او مش بتنسيك بس بتخلى حاجات تانية تبقى موجودة بداله فحتى لو فى دماغك انت اصلا مافيش مساحة فاضية فى عقلك تفكر فيه
زى ظاهرة ELECTROPHORETIC EFFECT **-بما انى كيميائية يعنى-
كنت بسمع حلقة الطالب العبقرى "أمين" مؤسس علم الديناتولوجى .. فى اجابة عن سؤال ما قال "انا ماعرفش حد مش كويس كل اللى حواليا كويسين و ساعدونى سواء بالدعم او النصيحة .."
سبب تانى
اننا مش مركزين
بمعنى
انى اشتغل ع كل اهدافى فى نفس الوقت .. دى حاجة كويسة جدا بس فى حالتين ان الاهداف دى ماتكونش متطلبات لبعض
او ان الاهداف دى ماتتداخلش مع بعض ..
يعنى يا جماعة لو انا مثلا عاوزة اتعلم برنامج معين و اثناء تعلمى ليه حبيت اتعلم واحد تانى .. المفروض منطقيا انى اخلى التانى بعد الاول و لو عاوزة اتعلم فى وقت اسرع يبقى اضغط وقت الاول انما الاتنين مع بعض متهيالى فيه شئ من الصعوبة ..
سبب تالت
فى مقولة بتقول "للنجاح أعداء"
من اكبر المشاكل اننا ننشغل بالاعداء عن النجاح نفسه .. خدو بالكو يا جماعة ..
حتى لو الناس دى هتسببلنا مشاكل و المفروض نفكر فيها .. فكرو فى المشاكل تفكير ايجابى لحلها مش تعقيدها اكتر
و فكرو فيها بنسة من وقتكم مش كل وقتكم
فكرو فى المشاكل مش فى الاشخاص ..
و ربنا معانا كلنا يارب و يحمينا من الناس دى..
مش فاكرة اسباب تانية !!
الحلول بقى ..
بالنسبة لاول سبب
اننا نعمل فلترة للى حوالينا او ع الاقل الناس اللى قريبين مننا .. اما اننا نسيب الناس السلبية و نلغيهم من حياتنا
او
اننا نلغى كل حواسنا لما ييجو يبثو لنا طاقة سلبية
بالنسبة للسبب التانى
نراقب نفسنا .. بحيث انى لما الاقى التشتت ده هيبدأ أفكر نفسى انى كده مش هحقق حاجة لان اللى عاوز كل حاجة مش هيعمل اى حاجة
و نسجل افكارنا فى كراسة مثلا مخصصة لكده بحيث مانفقدش اى فكرة كويسة
و لما يكون عندنا هدف نحدد خطواته بشكل تفصيلى بحيث مايكونش فى مكان لاى تشتيت باذن الله
بالنسبة للسبب التالت بقى
نفس التانى
مراقبة نفسنا برده ..
و نفتكر دايما
"قل لن يصيبنا الا ما كتب الله لنا"
و نفتكر برده اننا لو اتاثرنا او فكرنا فى الناس دى احنا كده بمنتهى البساطة ادينالهم اللى عاوزينه بمنتهى السهولة
كان فى جملة قريتها قبل كده فى كتاب لا تحزن و ابتسم للحياة -للشيخ محمود المصرى-
مضمونها
ان اعداء النجاح دول شايفين نجاحك ذنب لا توبة منه الا فشلك ..!!
:::::::::::::::::::::::::::::::::::::::::::
ELECTROPHORETIC EFFECT
دى ظاهرة مرتبطة بالتوصيل الكهربى للمحاليل الإلكتروليتية
لو عندنا محلول موصل للتيار الكهربى -NaCl مثلا- هيبقى مفكك لايوناته Na+ .. Cl-
كل ايون هيبقى محاط بايونات مخالفة ليه فى الشحنة-ناس ماعندهاش هدف و محبطين - و الايونات المخالفة دى هتبقى مرتبطة بجزيئات المذيب -طاقة سلبية -و ده بيقلل من سرعته فى المحلول و بالتالى بيقلل من توصيله الكهربى
:::::::::::::::::::::::::::::::::::::::::::::::::::::
ربنا يوفقنا جميعا يارب و ينصر بينا أمتنا
