السبت، 18 سبتمبر، 2010

حدد هدفك (4)





السلام عليكم و رحمة الله


طيب انا دلوقتى عرفت اكتب رسالتى و رؤيتى ازاى
و عرفت كمان احدد هدف فعال ازاى
و كمان عرفت اهمية التخطيط
عاوزة اخطط بقى لحياتى .. اعمل ايه؟؟

اولا
1- نحدد ايه الجوانب المهمة فى حياتنا
روحانى
مادى
عملى
شخصى و مهارات
اسرى
تطوعى
دعوى
صحى
؟
؟
؟
؟
(حسب كل شخص يحدد ايه الجوانب المهمة فى حياته)

2- رتب الجوانب دى حسب أولويتها بالنسبة لك
يعنى مثلا
1-الروحانى
2- الاسرى
3- الصحى
4-الشخصى و المهارات
5-..
6-..
و هكذاااا

3- هنيجى بقى لكل جانب نكتب فيه الآتى :
A-أهمية الجانب ده فى حياتك ايه؟؟
ليه هو من اولوياتك؟؟
ليه عاوز تحقق فيه اهداف؟؟

(ده هيبقى قوة دافعة ليك عشان تحقق اهدافك فيه)

B- رسالتك فى الجانب ده ايه؟؟
زى ماحددنا رسالة عامة لحياتنا .. هنحدد رسالة لكل جانب فى حياتنا(بنفس الطريقة)

C- قدوتك مين فى الجانب ده؟؟
يعنى لو الجانب المهنى مثلا
مين قدوتك ؟؟
و اكتب اسباب كونه قدوة ليك
و يُفضل لو تكتب قدوة قريبة و بعيدة
يعنى قوة عالية اوى و قدوة مرحلية عالية بس مش ده طموحك
و طبعا

كن نفسك .. تكن مميزاً

D-الاهداف بقى مُقسمة ل:
أهاف قصيرة المدى(من 15 دقيقة حتى سنة)
أهداف متوسطة المدى(من سنة الى 5 سنوات)
أهداف بعيدة المدى (عمرك كله)
الاهداف القصيرة و المتوسطة المدى بتكتسب قوة لما تتحول لطويلة المدى
بمعنى
لو انا مثلا عاوزة اخد كورس فى حاجة معينة (هدف قصير المدى)
اخليه طويل المدى انى بعد ما اتعلمه اعلمه لغيرى
ده بيديله قوة
و بيدينى استمرار

كمان غالبا الاهداف طويلة المدى بيبقى ليها خطوات فى القصيرة و المتوسطة المدى ..

و احنا بنحدد اهدافنا طبعا لازم نراعى انها تكون فعالة (SMART&POSEE)

::::::::::::::::::::::

و بكده .. انت خططت لحياتك .. الف الف مبرووووك

فى اشارات ع الطريق .. يارب تساعدنا كلنا

1- خليك دايما مركز ع اهدافك .. اوعى تنشغل بالوسيلة عن الغاية
و اوعى تسمح لحد يعطلك او يوقفك او يشغلك بتفاهات عن اهداف عظيمة

2- صاحب الناس الايجابية .. الناس اللى دايما تذكرك باهدافك حتى لو ماتكلموش معاك عنها
ناس طموحة و مخططة لحياتهم و عارفين ان حياتهم مش لعبة و هيتسالو عليها

3- خلى كل حاجة فى حياتك تذكرك بهدفك
خلفية الجهاز
اوضتك
موبايلك
كلامك
كل حاجة فى حياتك اربطها باهدافك .. كل حاجة حواليك خليها تفكرك باهدافك

4-الكتمان
بصو يا جماعة انتو مش هتستفيدو حاجة لما تقولو اهدافكو لحد يحطمكم او يستقل بيها
و مثبطى الهمم متبرعين بالمجان فى كل مكان و كل وقت

هدفك لنفسك
ماتقولهوش لحد الا و انت عارف انه هيدعمك
او هيفيدك
او بتعرضه عليه بحيث تشوف هو صح ولا لا
او بتفيده هو
يعنى ماتقولش هدفك من غير سبب

خليها مفاجأة لكل اللى بيحبوك .. و حسرة لكل اللى بيكرهوك

و حاجة كمان
لو قلت هدفك لحد ممكن يدعمك و لا قدر الله يحصل اى تعطيل
يوقفك هو بعد كده و يقولك كلام محبط
و ع ايييييييييييه؟؟

"استعينوا على قضاء حوائجكم بالكتمان"

5- كافئ نفسك
لما تنجز خطوة لهدفك او تحقق هدف
كافئ نفسك
فرحها باهدافها .. انت مش الة بتشتغل عشان تنفذ و خلاص
انت انسان تفرح و تسعد بانجازاتك

احنا اصلا بندور ع النجاح عشان نسعد نفسنا سواء فى الدنيا او الاخرة -ربنا يرزقنا كلنا سعادة الدارين ياااااااارب-

6-كن مرناً ..

7- راجع اهدافك و خطتك باستمرار .. و اسال نفسك دايما
احسن من نفسى ازاى؟؟
اوصل لاهدافى باحسن طريقة ازاى؟؟
انا عاوز ايه؟؟
بعمل ده ليه ؟ و مابعملش كذا ليه؟؟

8- ثااااااااااااااااااااابر و صمم ع الوصول

"ليس هناك أى شئ ضرورى لتحقيق نجاح من أى نوع أكثر من المثابرة لأنه يتخطى كل شئ حتى الطبيعة"

8- ثق فى الله ثم فى نفسك
لو انت ماوثقتش فى نفسك منتظر مين يثق فيك؟؟
لو انت مش شايف نفسك قادر ع تحقيق حلمك .. ليه بتلوم الناس لما يشوفك كده؟!!

9- 5M
مسلم , ملتزم , متزن , مسئول , مرن

ماتخليش جانب فى حياتك يطغى ع التانيين
رتب حياتك حسب أولوياتك و التزم بتحقيق اهدافك
و رتب أولوياتك


10- كل الحاجات دى بدون الاستعانة بالله لا شئ ..

"احرص على ما ينفعك و استعن بالله و لا تعجز"

ادعى ربنا كتييييييير انه يعينك .. و توكل على الله
و اعرف ان اهدافك فى منها خير ليك و منها مش خير
مادام بتعمل اللى عليك لو ماوصلتش ماتزعلش
بس خلى عندك اصرار .. و ثقة فى الله
و استخير ربنا دايمااااااا
اخلص النية لله ..

:::::::::::::::::::::

و أخيراااا

انا قلت العلم اللى ربنا هيسالنى عليه يوم القيامة
بس حضراتكم هتتسالو على كل معلومة عرفتوها
عملتو بيها ايه؟؟
و ضيعتو وقتكو فيها و خلاص .. و لا استفدتو منها
بجد يا جماعة
أمتنا و الله العظيم محتاجانا بلاش نخذلها
بلاش نكون زى اى حد
اتولد عادى و عاش عادى و مات عادى
هيندم يوم القيامة الشخص اللى ربنا اداله عمر و ما عملش فيه حاجة

احنا ربنا خلقنا مسلمين
ارتضى لينا الاسلام
و ارتضانا للاسلام

هننصره و نكون أد المسئولية ؟؟

:::::::::::::::::::::::


ربنا يوفقنا كلنا يااااااااااااارب

اتمنى
لو حد استفاد ولو بكلمة يدعيلى

"ربنا يرضى عنى و يرزقنى الاخلاص و يعيننى على تحقيق أهدافى و يجعلنى سبب من أسباب نصرة الإسلام و أمة محمد عليه الصلاة و السلام .. و ادعو لبابا و ماما ربنا يرضى عنهم يارب "

جزاااااااكم الله كل خير

::::::::::::::::::::::

" لعل من عجائب الحياة إنك إذا رفضت كل ما هو دون مستوى القمة .. فإنك دائما تصل إليها "


إعداد / شموخ مسلمة

الخميس، 16 سبتمبر، 2010

حدد هدفك (3)


السلام عليكم و رحمة الله

اقتباس:
و ده اللى هنعرف اجابته المرة الجاية باذن الله ..
** الرسالة .. الرؤية .. و الهدف .. ايه الفرق بينهم ؟؟؟
و ازاى احددهم ؟؟

الرسالة
اتجاه فى الحياة لا يُحسب .. فهى ما تود أن تسير عليه فى الحياة

الرؤية
نتيجة تقاس و تحسب .. فهى ما تود تحقيقه و الوصول إليه

الرسالة
نوعية

الرؤية
كمية

الرسالة
عامة و غير محددة

الرؤية
هدف محدد

الرسالة
تستمر طوال الحياة ولا تنتهى

الرؤية
تنتهى بتحقيقها


**أما الهدف:
هو الملاحقة المستمرة لغاية بغرض حدوثها و هى إما أهداف مستمرة مثل العبادة أو أهداف مرحلية تنتهى بحدوثها مثل قراءة كتاب أو شراء سيارة

السؤال بقى .. أطبق الكلام ده فى حياتى ازااااى ؟؟

لتحديد رسالتنا فى الحياة:

1- هنكتب 10 اهداف عاوزن نحققهم خلال الشهر ده مثلا
و ليكن
1- احفظ جزء قران
2- اجيب هدايا لبابا و ماما
3- اتبرع بالدم
4- اتصل باقاربى و اطمن عليهم
5- اتصل بصحباتى و اطمن عليهم
6- اقرأ كتاب فى تخصصى
7-اقرأ كتاب (ماذا خسر العالم بانحطاط المسلمين)
8- احفظ اخواتى أول 5 سور من جزء تبارك
9- اتعلم مهارة القراءة السريعة
10- اقرأ كتاب منهاج المسلم

دى اهداف كمثال ..

2- هكتب الشعور المصاحب لكل هدف من دول

يعنى لما احفظ جزء قران هشعر بايه

ثقة بالنفس
رضا عن نفسى
تقدم فى علاقتى مع ربنا
رضا ربنا
سعاااادة

اجيب هدايا لبابا و ماما .. هشعر بايه
رضا عن نفسى
رضا بابا و ماما
فرحة بابا و ماما
رضا ربنا
سعااااادة

و هكذااااااا فى باقى ال10 اهداف

3- بعدين نشوف اكتر شعور تكرر ايه؟؟
و لنفرض مثلا
رضا ربنا و سعادتى و سعادة غيرى

يبقى رسالتى
ارضاء الله سبحانه و تعالى باسعاد نفسى و الاخرين

لو اكتر احساس تكرر
رضا ربنا و سعادتى و نصرة امتى

يبقى رسالتى
ارضاء الله سبحانه و تعالى بالمساهمة فى نصرة امتى و اسعاد نفسى

و هكذاااا
أفضل كتييييييير ان رسالتنا تكون فيها جزء للى حوالينا لاننا مش عايشن حياتنا لنفسنا و بس لازم نفرح و نفرح غيرنا و ننجح و نساعد غيرنا انه ينجح

(و ماتنسوش أمتنا)

:::::::::::::::::::

لتحديد رؤيتى فى الحياة :
تخيل أنك فى اخر عمرك .. فى لقاء تليفزيونى .. المذيع سأل حضرتك سؤال

ياترى يا .. ايه أكبر انجاز فى حياتك؟؟؟

اجابة السؤال ده هى رؤيتك

ممكن حد يبقى شايف انه اخترع كذا
او عمل دكتوراة فى فرع كذا
او انه كان سبب فى نشر الاسلام فى مدينة كذا

بس افتكرو ان الرؤية هدف محددة

احنا كمسلمين ربنا أنعم علينا ان وجهتنا محددة لينا

فى مدرب قال كلام جميل جدا:

اقتباس:

احنا كمسلمين
المفترض
رؤيتك
الجنة (او العمل اللى هتدخل منه الجنة)


و رسالتك
"و ما خلقت الجن و الإنس إلا ليعبدون"
مع العلم ان العبادة مش صلاة و صوم و قيام فقط .. كل عمل فى حياتنا عبادة مادام بنعمله لله و متبعين فيه سنة رسول الله صلى الله عليه و سلم

::::::::::::::::::::::::::


لتحديد الهدف :
لازم اولا اكون عارف ازاى احدد هدفى و يكون هدف فعال

عشان نحدد هدف لازم يتوافر فيه مواصفات مجموعة فى كلمتين

SMART & POSEE

SMART:

S=specific

هدفك لازم تكون محدده و عارف انت عاوز ايه بالضبط
"لن يستطيع الرامى أن يصيب قلب الهدف إذا لم يكن يعرف الهدف فى الأساس"

يعنى ماينفعش يكون هدفى اتفوق !!
تتفوق فى انهو مجال؟؟
و تتفوق فى ايه بالضبط فى المجال ده؟؟

ماينفعش اقول انا عاوز اشترى عربية
لا انا عاوز اشترى نوع كذا من العربيات و لونها كذا و.. الخ(كل ما حددت هدفك اكتر كل ما زادت قدرتك على تحقيقه باذن الله)

M= measurable

"If you can't measure it , you can't manage it"
لما نحدد هدف .. هنعرف ازاى اننا حققناه او حققنا منه جزء او نقدر نحدد نسبة نجاحنا فيه ؟؟
لازم يكون فى معايير
1-
2-
3-
بحيث انى اجى فى الاخر اشوف اتحقق من المعايير دى ايه و ماتحققش ايه و بناء عليه اقول انا نجحت بنسبة ..%

بمعنى
ماينفعش اقول هدفى احسن من اخلاقى..
طيب امتى تعرف انك حسنت اخلاقك ؟؟
هنا و لا حددنا احنا عاوزين ايه بالضبط
ولا حددنا معايير اعرف بيها انى حققت هدفى

انما لو قلت مثلا هدفى احفظ جزء تبارك و عمّ و اعمل خطة مقسمة لخطوات عملية
اذا حفظت الجزأين هبقى نجحت بنسبة 100%
لو حفظت جزء و جزء لا هقدر احدد نسبة نجاحى
يعنى فى الاخر هقدر اقول انا نجحت بنسبة كام

A= agreed

هل انت مقتنع بهدفك و موافق عليه؟؟
يعنى هل رغبتك فى الدخول كلية معينة بناء على رغبتك و انك شايف انها الانسب لمواهبك ؟؟ و لا بسبب اللى حواليك او عشان تقلد حد معين؟؟

انت مقتنع بهدفك؟؟
شايف انه يستاهل انك تضحى بحاجات كتييييييييير عشان تحققه؟؟
حاسس باهميته؟؟
لازم تكون كده .. الهدف لازم يكون هدفك انت .. مش غيرك
و اللى موافق عليه انت .. مش لازم غيرك
لانك انت اللى هتبذل عشانه
و انت اللى هتفرح و ترتقى بذاتك بتحقيقه

R=realistic

هدفنا لازم يكون واقعى "فأحلام العصافير لا تتحقق"
ماينفعش نحدد لنفسنا هدف مستحيل لسبب بسيط
مش هنقدر
و هنيأس
لازم يكون فى نوع من العقلانية و احنا بنحدد اهدافنا

بس هل ده معناه انى احدد هدف سهل ؟؟
هدف ناس كتير حققته؟؟
و هل معنى انه مش مستحيل ان اصحابى مثلا يقتنعو بيه؟؟

لا طبعا
احنا لو تخيلنا تدرج صعوبة او سهولة الشئ
اقل حاجة السهل
اعلى منه السهل الممتنع
اعلى منه الصعب(بتفاوت درجاته)
اعلى منه المستحيل
احنا بقى اهدافنا المفروض تكون فى المنطقة الصعبة

بمعنى
ماينفعش حد مننا مثلا ييجى يقول انا هدفى كمان شهر اخرج بجيش مكون من 10000 شخص و اروح احارب اسرائيل !!! فى حالة انه مافيش فى ايده اى سلطة ولا تاثير سياسى و الوضع زى ماحنا شايفين حاليا

بس ينفع حد يقول هدفى انى اشتغل بحيث انى كل شهر اوفر 1000 جنيه اتبرع بيهم لفلسطين

خدو بالكم يا جماعة
مش كل هدف يرفضه اصحابنا او مجتمعنا يبقى مستحيل
خد برأى الناس الناجحة
المفكرة
مش كل حد .. ولا أى حد


T=timed

لما نحدد هدف من أهدافنا لازم نحدد ميعاد نبدأ فيه خطوات عملية لتحقيق هدفنا
و ميعاد ننتهى فيه (تحقيق الهدف)
لاننا لو كتبنا هدف و قوى جدا و عاوزين نحققه و ماحددناش وقت
التأجيل و التسويف و التشتت هيمنعونا
انما لما احدد وقت هبدأ يوم كذا و احققه يوم كذا
كده بلزم نفسى انى هحققه

يعنى لو هدفى انى اقرأ كتاب
لو ماحددتش وقت ابدأ فيه بقراءة الكتاب
ممكن اقضى سنة كاملة و لسة مابدأتش فيه
مع انى حاطاه هدف

و لو ماحددتش وقت اخلصه فيه
ممكن اقضى سنة تانية من عمرى فيه !!


POSEE :

P=positive

أن الهدف يكون ايجابى ليه شرطين
1- إيجابى فى صيغته
يعنى اقول الحاجة اللى انا عاوزاها مش اللى انا مش عاوزاها

اقول انا هدفى انى انجح
ماينفعش يا جماعة اقول هدفى انى مانزلش فى مادة

هدفى انى اكون هادية
مش
هدفى انى ماكونش عصبية
و هكذاااا
لان عقلنا الباطن بيشيل النفى و يثبت اللى بعده

2- ايجابى فى ذاته
ماينفعش احدد هدف لنفسى و اتعب عشان احققه و هو يكون اصلا هدف سلبى
ماينفعش حد يحط هدف انه يغش فى الامتحان 5 اسئلة!!
ولا أنه ينرفز 4 اشخاص كده كل يوم الصبح
و من سلبية الهدف ان يكون هدفنا ضرر غيرنا
يعنى ماينفعش هدفى ابقى الاولى
و فلانة الاخيرة!!!
باى منطق ؟؟
حب الخير لنفسك و لغيرك "حب لأخيك ما تحبه لنفسك"
بلاش نبقى عاوزين احنا ننجح و التانيين يفشلو
دى سلبية و حاجات كتير تانية مافيش داعى لذكرها هنا

O=ownpart

لازم هدفى يكون يخصنى انا
لا يعتمد على غيرى
او على ظروف و صدف مُتوقع حدوثها

هدفى اكون الأولى
و اساعد اختى انها تكون الاولى
انما ماينفعش يكون هدفى ان اختى تكون الاولى
مش بايدنا ..

S=specific

(قلناها فوق)

E=evidence

ازاى اعرف انى هدفى اتحقق
(قلناها فوق برده)

E=ecology

هل فى جوانب تانية فى حياتى هتتأثر سلبا بتحقيقى للهدف ده؟؟

هنا هنتبع مبدأ المصلحة
و ترتيب الأولويات

بمعنى

يعنى مثلا لو الهدف اللى انا عاوزة احققه علمى
و الجانب اللى هيضر فى حياتى اسرتى

السؤال
انهو اهم؟؟
و هل اقدر اتجنب الضرر او اخفف من اثره؟؟
و انهو مناسب لأولوياتى؟؟
و خدو بالكو يا جماعة فى قاعدة بتقول "درء المفاسد أولى من جلب المنافع"
بس بحدود برده
يعنى لو التاثير السلبى خفيف او نقدر نعوضه و مايمسش دينى و عقيدتى وقيم و ثوابت عندى
يبقى حسب الاولوية بقى اللى هنحددها باذن الله المرة الجاية

:::::::::::::::::::::::
كده المفروض يبقى التطبيق العملى
تحديد الرسالة و الرؤية

اخر جزء من الموضوع باذن الله هنزله السبت او الاحد عشان يكون فى وقت لتحديد الرسالة و الرؤية

انا نزلت الجزء ده ع طول لان اللى قبل كده ماكنش فى تطبيق و عشان يكون قبل الدراسة ..

بكرر تانى كل الكلام ده لا قيمة له بدون تطبيق ..

::::::::::::::::::::::::

"إذا هدفت إلى السماء فسوف تحصل على الأرض معها .. و إذا هدفت إلى الأرض فلن تحصل على هذه أو ذاك"

الأربعاء، 15 سبتمبر، 2010

حدد هدفك (2)


السلام عليكم و رحمة الله

اتكلمنا عن التخطيط بين السلبيات -بناء على اعتقادنا- و باذن الله المرة دى هنكمل اول محور اللى هو

"التخطيط بين الايجابيات و السلبيات & أهمية الأهداف فى حياتنا"

1- التحكم فى الذات
انت لما تخطط لحياتك هتعرف 3 حاجات

انت فين؟؟
رايح على فين؟؟
ازاى؟؟

مجرد ما نعرف الاجابة على ال3 اسئلة دى بنحس بقوة جبارة اننا نحطم اى عائق ادامنا
و اى حاجة ولو صادرة مننا او رغبة جوانا ممكن تعطلنا عن اهدافنا اللى احنا رضينا بيها لحياتنا
و بيها هتكون حياتنا عظيمة
هنقدر نقول لنفسنا "لا .. فما أجمل حياتى عندما أنجز ما اتفق الناس على كونه مستحيلا"

2- الثقة بالنفس
بمجرد كتابتك لأهدافك و وضع خطة عملية لتحقيقها بتحس بقوة ثقة بنفسك كبيييييرة جدااا
بتزيد ثقتك بنفسك لانك بدأت فعليا تتحكم فى نفسك و فى حياتك
بتزيد ثقتك بنفسك لأنك ليك اهداف و بتحقق انجازات فى حياتك
مش عايشها كده و زى ما تيجى تيجى!!

ثقتك بنفسك هتزود تحقيقك لاهدافك .. و العكس صحيح كل ما تحقق هدف من اهدافك تزيد ثقتك بنفسك .. فهى عملية عكسية

و الشخص الواثق من نفسه مافيش مخلوق يقدر يوقفه عن تحقيق اهدافه أو عرقلته .. لأنه عارف كويس اوى هو عاوز ايه و واثق انه بعون الله هيقدر يحققه

3- رقى الذات
"قيمتك فى الحياة هى ما تحققه فى حياتك من انجازات و أهداف "

تعالو نتخيل احترامنا لذاتنا مبنى عالى .. جميل .. جذاب .. بس احيانا بنشوفه متعب لانه عالى
ليه سلم .. نقدر نطلعه
كل ما بنحقق هدف من اهدافنا بنكون طلعنا درجة من السلم
ممكن تواجهنا عقبات .. بس لاننا شايفين نهاية السلم و قررنا اننا نوصله
كل عقبة بتثير جوانا حماس و تحدى .. هنقهرها .. صدقونى هنقهرها مادام معانا ربنا
و عارفين هدفنا
و عارفين هنوصله ازاى
مافيش مخلوق .. و لا ظرف ... هيقدر يوقفنا توقف دائم
بل بالعكس
كل تحدى بنقهره بنحس بفرحة و استمتاع و قوة دافعة لينا اكتر

3- ادارة الوقت
ادارة الوقت و تحديد الهدف وجهان لعملة واحدة
بمجرد كتابتك لهدفك .. هتضطر لترتيب أولوياتك و ادارة وقتك
اضطرار اختيارى لا اجبارى

4- استمتاع بالحياة
عدم وجود خطة فى حياتنا بيخلينا عايشين مضطربين .. كل حاجة متداخلة
لاقل الاسباب نفقد توازننا .. و نحس اننا تايهين و فاشلين!

التخطيط بيخلينى اعيش هدفى و استمتع بتحقيقه قبل ما احققه .. و وقت ما احققه .. و بعد ما حققته-باذن الله-

:::::::::::::::::::::::::::::

"ارم بقوسك نحو القمر لأنك حتى إن لم تصبه سيقع سهمك بين النجوم"

::::::::::::::::::::::::::::

طيب لما التخطيط مهم و ممتع كده .. ليه غالبية البشر ما بيخططوش لحياتهم؟؟

1-الخوف من عدم استطاعتنا الوفاء بها

"الشخص و إن لم يصرح بذلك يخاف أن يحدد هدفا يكشف له كم هو ضعيف و غير قادر على امتلاك زمام حياته .. وضع الأهداف و الخطط يجعلنا ملزمين بالوفاء بمتطلبات عديدة و معظم البشر لا يحب الإلتزامات .. القوى فقط و الفعال هو من يضع الخطة و يعزم على الوفاء بها .... د\إبراهيم الفقى"

2- عدم الثقة فى النفس

انا اساسا فاشل
مش هقدر انا عارف نفسى
يا جماعة الهدف ده كبير عليا .. لالا مش هقدر
الظرووووووووووووووووف .. مش هقدر اتحداها
!!!!!

انت شايف نفسك مش هتقدر؟؟
شايف نفسك اقل من حلمك؟؟
شايف نفسك ماعندكش قدرات ولا مواهب؟؟

سؤال..
لو انت كده .. ربنا خلقك انسان و حملك مسئولية حياتك و ميزك عن الكائنات التانية بعقل .. لييييييييه؟؟

3-التأجيل

طيب بكرة هخطط
طيب طيب خلاص بكرة هبدأ خطوة عملية

بكرة+ بكرة + بكرة + كمان شوية + بعدين = صفر

4-عدم الإيمان بجدوى التخطيط

ممكن حد يكون شايف للتخطيط اى سلبيات -من رأيه-
و بالتالى هو مش مقتنع بيه اصلا
و بالتالى
مش مقتنع بيه = مش هنفذه


5- الجهل بطرق التخطيط السليمة

ممكن يكون حد مؤمن باهمية التخطيط
و عاوز فعلا يخطط لحياته

بس مش عارف
طيب ابدأ منين ؟؟
ازاى؟؟
طيب لو فى مشكلة قابلتنى ؟؟

و ده اللى هنعرف اجابته المرة الجاية باذن الله ..

:::::::::::
ملحوظة : العناوين الرئيسية للجزء ده مقتبسة من كتاب سحر القيادة ..د\ابراهيم الفقى
::::::::::::

الأحد، 12 سبتمبر، 2010

حدد هدفك (1)




السلام عليكم و رحمة الله





"التخطيط"




لأن أمتنا فعلا محتاجانا .. محتاجة ناس محددة هدفها .. و مخططة لحياتها و بتنفذ خططها .. لأننا عاوزين نسيب فى الدنيا بصمتنا الايجابية .. لأن حياتنا مش لعبة نلعبها و يا نفوز يا نخسر .. لحاجات كتييييير اوى


هنتكلم عن التخطيط ..




محاور الموضوع ..


1-التخطيط بين الايجابيات و السلبيات


2- اهمية تحديد أهدافنا


3- لماذا لا نحدد أهدافنا؟؟


4- الفرق بين الرسالة .. الرؤية .. الهدف؟؟


5- ازاى احدد رسالتى و رؤيتى ؟؟


6- تحديد الجوانب المهمة فى حياتنا و ترتيبها حسب الأولوية


7- ايه مواصفاتا الهدف الفعال؟؟


8- تحديد أهدافنا فى كل جانب من جوانب حياتنا



:::::::::::::::::::::::



أهم حاجة فى الموضوع ده يا جماعة.. التطبيق العملى ..



:::::::::::::::::



التخطيط للحياة هل بيخلينا بنعيش حياتنا كأننا أداة لا روح فيها؟؟



هل التخطيط خيال بعيد تماما عن الواقع؟؟



هل التخطيط بيمنعنا من استغلال الفرص؟؟



هل التخطيط تضييع للوقت ؟؟



هو انا ممكن اخطط لحاجة و ييجى فى بالى افكار جديدة بعد كده .. يبقى ايه فايدة التخطيط بقى ؟؟



انا معترف ان التخطيط مهم بس التلقائية-اظنها- احسن من التخطيط على الأقل فى بعض الاوقات ..



طيب ما فى ناس كيتر عايشين حياتهم بدون تخطيط و ناجحين .. اشمعنى انا اللى لازم اخطط .. انا هاخدهم قدوتى..




دى بعض الافكار فى ذهننا بخصوص التخطيط .. يا ترى الاعتقادات دى صح او ممكن تكون صح ؟؟




** التخطيط مش بيخلينا اداة هو بينظم دورنا احنا فى الحياة

الاداة لا تختار ما تفعله ولا تنظمه
انت .. بتخطيطك لحياتك بتختار ما تريد ان تفعله انت و ليست ماتفرضه عليك ظروفك و ظروف الاخرين و تخطيطهم لحياتهم
"لانك ان لم تخطط لحياتك فستكون اداة تنفيذ لخطط الاخرين"
بتخطيطك انت لحياتك بتنظم افكارك و اهدافك و بتبقى دايما مركز عليها و بتربط حياتك بيها عشان تحقق انجاز عظيم بعد كده مش تبقى مجرد امانى و احلام
فى تخطيطنا لحياتنا بجانب الجدية و الالتزام فى تنفيذ خططنا .. الا ان المرونة موجودة و دى اللى بتمنع تحولنا لاداة تنفذ فقط



** هل التخطيط خيال بعيد عن الواقع


فى 3 انواع من البشر
نوع شايف انه هيخطط لحياته و الدنيا هتنفذ بدون أى عوائق!
و نوع شايف انه هيخطط شئ و ينفذ شئ تانى خااااااااالص .. و المهم انه خطط !

و نوع تالت تخطيطه بيديله القوة انه يتغلب على اى تحدى .. قوة تخليه يتعامل بشكل ايجابى مع أى عائق .. قوة ايجابية يشوف بيها الجزء المضئ من المشكلة و ده اللى ينطبق عليه " العالم يقف جانبا ليسمح لمن يعرف وجهته بالمرور .."



** هل التخطيط ممكن يمنعنا من استغلال الفرص؟؟
بالعكس تماما
التخطيط بينشط ذهننا لادراك الفرص المناسبة لينا و هنا ييجى دور المرونة
المرونة شئ ضرورى فى تنفيذ خططنا و ترتيب الاولويات كذلك
بمعنى
لو انا مخططة انى فى الاجازة دى هقرى كتابين فى تخصصى عشان ازود معلوماتى فيه
و جاتلى فرصة انى اخد كورس او تدريب معين و ماكنتش عاملة حسابى على كده
طبقا للمرونة و ترتيب اولوياتنا
هناخد الكروس و نخطط لقراءة الكتب مع الكورس-باسلوب مختلف عن التخطيط الاول- او نخطط لقرائتها بعد الكورس
بتعديل بسيط فى خطتنا .. لان الخطة مش حاجة هنكتبها و نحطها فى درج المكتب و ننساها ..
طيب حاجة تانى .. لو انا مخططة انى الاجازة دى هاخد 3 كورسات و محدداهم
و دخلت المستشفى مثلا فترة كبيرة من الاجازة لتعب مفاجئ .. هل اتنازل عن ال3 كورسات
هنا نفس الحكاية .. المرونة .. هشوف اللى باقى من الوقت و على اساسه هعيد كتابة اللى انا عاوزاه فى الجانب ده و لما اخد كورس افضل من انى ماخدش اصلا
خططنا قابلة للتغيير (البسيط) و ممكن تغيير جذرى .. بس بشرط
مايكونش هروب من التنفيذ ..
هنا ممكن حد يقول طيب و ايه لازمة التخطيط بقى هنا؟؟
انت و انا و احنا كلنا مش عارفين قدر ربنا .. احنا بنخطط و علينا لما يحصل ظرف نتكيف معاه بشكل ايجابى
"إن أرفع درجات الحكمة البشرية هى معرفة مسايرة الظروف و خلق سكينة و هدوء داخليين على الرغم من العواصف الخارجية"

**هل التخطيط تضييع للوقت ؟؟

"إن قضاء 7 ساعات فى التخطيط بأفكار و أهداف واضحة لهو أحسن و أفضل نتيجة من قضاء 7 أيام بدون توجيه أو هدف"



**هو انا ممكن اخطط لحاجة و ييجى فى بالى افكار جديدة بعد كده .. يبقى ايه فايدة التخطيط بقى ؟؟



مرووووووونة .. انت مش مخطط لحياتك عشان تبقى اجبار ليك .. انت مخطط لحياتك عشان تخليها احسن و تنفذ اهدافك .. الافكار الجديدة تضاف للخطة بعد تعديل بسيط و ممكن اضافات ماتعملش تغييرات


التخطيط وسيلة و ليست غاية ..



**انا معترف ان التخطيط مهم بس التلقائية-اظنها- احسن من التخطيط على الأقل فى بعض الاوقات ..


"إذا لم تكن تعرف ما تريد فإنك لا تصل إلى ما تريد لأنك لا تعرف ما تريد أصلاً .. بإحتصار لن تحقق شيئا بالصدفة"




**طيب ما فى ناس كتير عايشين حياتهم بدون تخطيط و ناجحين .. اشمعنى انا اللى لازم اخطط .. انا هاخدهم قدوتى..

"قد ينجح شخص لا يخطط .. لكنه .. اولا قد يعيش مضطربا .. ثانيا هو استثناء و ليس قاعدة و لا يجب أن يبنى عاقل علىاستثناء"


::::::::::::::::::::::


إنسان بدون هدف كسفينة بدون دفة كلاهما سوف ينتهي به الأمر على الصخور ( توماس كارليل )

::::::::::::::::::::::

للحديث بقية باذن الله..


الخميس، 9 سبتمبر، 2010

معلش .. احنا برده أخوات



السلام عليكم و رحمة الله

كل سنة و حضراتكم طيبين .. عيد سعيد علينا كلنا يارب

::::::::::::::::::::

كتير اوى بنلاحظ ان لما حد ييجى يدعو حد للالتزام مثلا
او الصلاة
او التوبة
او اي حاجة متعلقة بالدين عموما
اوقات نتنرفز
و اوقات نغلط فى الى ادامنا
و اوقات نكرهه فينا و فى الدين
و اوقات تانية نخليه يحلف ما هيعمل الحاجة دى مع انه نفسه يعملها

طيب ليه يا جماعة؟!

عاوزين نكون متفقين ع حاجة

اولا
احنا لما ننصح او ندعو حد مش بنبقى عاوزين نعمل اللى علينا و خلاص هو حر
و فى نفس الوقت
احنا مش مسئولين عنهم و عن فعلهم
بمعنى
اننا نجتهد و نجتهد جدا اننا ندعوهم بالحكمة و الموعظة الحسنة
بس ماينفعش اروح اتخانق مع حد عشان بيعصى ربنا
لا
شوف طريق تانى
فى مليون طريق غير ده
حد ممكن يستجيبلك بكلام العقل .. يبقى ادعيه بالعقل..مش هتعرف.. يبقى بلاش انت مع الشخص ده حاول تجيبله مثلا شريط او كتيب لحد بيتكلم بالعقل و يقدر يقنع اللى قصاده بكلامه
حد تانى يستجيب لكلامك بالكلام عن الجنة
اوعى تكلمه انت ع النار
يبقى انت كده بتقوله اوعى تلتزم !!
و هكذااااا

و اوعو تنسو ان ماحدش فينا معصوم
و لا حد اتولد ملتزم
"كَذَلِكَ كُنتُمْ مِنْ قَبْلُ فَمَنَّ اللَّهُ عَلَيْكُمْ فَتَبَيَّنُوا إِنَّ اللَّهَ كَانَ بِمَا تَعْمَلُونَ خَبِيرًا"
و الاية كاملة اهى
"يَا أَيُّهَا الَّذِينَ آمَنُوا إِذَا ضَرَبْتُمْ فِي سَبِيلِ اللَّهِ فَتَبَيَّنُوا وَلا تَقُولُوا لِمَنْ أَلْقَى إِلَيْكُمُ السَّلامَ لَسْتَ مُؤْمِنًا تَبْتَغُونَ عَرَضَ الْحَيَاةِ الدُّنْيَا فَعِنْدَ اللَّهِ مَغَانِمُ كَثِيرَةٌ كَذَلِكَ كُنتُمْ مِنْ قَبْلُ فَمَنَّ اللَّهُ عَلَيْكُمْ فَتَبَيَّنُوا إِنَّ اللَّهَ كَانَ بِمَا تَعْمَلُونَ خَبِيرًا"

ماحدش فينا مش بيغلط
انا عارفة و الله اننا لما بندعو حد بيبقى نيتنا خير
بس معلش
حاولو تمسكو اعصابكم بقدر الامكان
لان ده اخوك
خاف عليه و حط نفسك مكانه
اتقرب ليه و بعدين انصح
و فى ناس مش بتحب النصيحة ليها مباشرة
خليها بطريقة غير مباشرة
بمعنى اصح خليك مرن فى دعوتك
و افتكر دايما
ان افضل دعوة للدين انك تبقى انت نفسك مجرد رؤيتك دعوة
غيرك يقتدى بيك و يحاول يعمل اللى بتعمله و تدى صورة كويسة للملتزمين
و لو غلطت مرة
احنا اتفقنا فوق
ماحدش مش بيغلط
ماتخليش الشيطان يقنعك انك مادام غلطت يبقى ماتنفعش تدعو للدين
ابداااااااااااااا و الله
اقرى سيرة الصحابة و شوف
ربنا يعيننا كلنا ياااااااااااااااارب

:::::::::::::::

النقطة التانية اللى عاوزة اتكلم فيها

ناس كتير بتقول الشيوخ بيتكلمو بشدة
او ان الناس اللى بتنصحنا دى بيتكلمو بعصبية و هما فاكرين نفسهم ايه يعنى و كده ...

كنت عاوزة اقول حاجة فى النقطة دى

مثال بسيط يمكن يوضح الفكرة
دلوقتى انا طالبة فى 3 كيميا ..
فى اللى فوقى معيدين كيميا
اكبر منهم شوية دكاترة
اكبر منهم شوية علماااااااء كيميا
اذا كنت انا بعمل تجربة (مع العلم ان طبعا المركبات الكيميائية ليها اضرار لا حصر لها ) التجربة دى مثلا كانت بحمض كبريتيك مركز و الكل عارف اثره اكيد

المهم

التجربة دى انا بعملها غلط
و هتضرنى
المعيدة
هتقولى حاسبى لو مش اخدت بالى هتزعألى
الدكتور اول ما هيشوفنى لو حكيم
هيخلينى اوقف التجربة بهدوء
لو لا
هيزعألى برده او هيطردنى(طرد مش كلمة اطلعى بره بس) بره المعمل و احتمال يفهمنى السبب
العالم بقى
هيفهمنى ليه التجربة غلط و هيخلينى ابطلها
طيب تخيلو بقى لو العالم او الدكتور او المعيد
ده اخوه هو اللى بيعمل التجربة دى
تفتكرو هيقوله حاسب و بس!!!
متهيالى صعب
لانهم شايفين اخوهم تقريبا هيدمر حياته و فى الاخر اخوهم اللى خسران مش هما
احنا كده
المسلم العادى اللى بيعصى ربنا ده هو طالب الكيميا
المعيد هو الانسان الملتزم
الدكتور هو الداعية
العالم هو الشيخ العالم الربانى
و احنا كلنا كمسلمين اخوات

و الله يا جماعة

كلام الشيوخ سواء الهادى منهم او اللى بيتكلم بشدة شوية
و الله عشانا احنا
هما مش هيكسبو حاجة مننا .. و لا هيخسرو
انما هما شايلين هم الدين
و شايلين همك انت كمسلم
بلاش تهدمهم انت
و بلاش تحسسهم ان مافيش امل
اى حد يقسى عليك زى باباك لما يقسى عليك عشان تطلع واحد يقدر يتحمل مسئولية
و زى مامتك لما تقسى عليكى عشان تبقى افضل بنت فى الدنيا

حتى لو حد نصحك بحاجة و انت شايف مثلا انه مش صورة كويسة للالتزام
طيب التزم انت
و وريه بقى الالتزام
و خليك انت قدوة ليه

لان الله اعلم يمكن انت شايفه حاجة و هو عند ربنا حاجة كبيييييييييييييييييرة جدا

الحياة مش لعبة و الجنة و النار مش لعبة
و للاسف
مش هنقدر نرجع نعملهم لما نعرف قيمتهم
اللى خايف عليك المفروض تشكره
حتى لو اتعصب شوية
اعذره
معلش
و الله خايف عليك
قوله بالراحة انا مش بحب الاسلوب ده
و خليك معاه لان ده ربنا باعتهولك عشان يذكرك بربنا

و اخيرا

بقولكم تانى عنوان الموضوع

معلش احنا اخوات
شايفنى بعصى
انصحنى نصيحة اخ(ت)
شايفنى كويس
اسمعنى لانى اخوك و خايف عليك
شايفنى مش واضحلى صورة
استفيد منى و ادعيلى ربنا يهدينى و يثبتنى على الحق

"المسلم أخو المسلم"

الخميس، 2 سبتمبر، 2010

طلب مساعدة ..

السلام عليكم و رحمة الله
كل سنة و حضراتكم بخير و فى سعادة و طاعة ربنا دايما يارب
انا كمان دقيقتين بالضبط هيبقى عندى 19 سنة .. و ده طبعا شئ مش عادى
من بدرى اوووووووى و انا نفسى يبقى عندى 19 سنة .. مش عارفة ليه
متفائلة اوى و حاسة ان هيحصلى حاجات كتير جميلة
الحمد لله السنة اللى عدت كانت من اجمل سنين حياتى ده لو مش اجملها
ادعولى السنة دى كمان تكون اجمل .. يااااااااارب لينا كلنا و للأمة الاسلامية كلها و لفلسطين و أقصانا -خاصة-
طيب انا عاملة الموضوع ليه؟؟
اكيد مش عشان تقولولى كل سنة و انتى طيبة .. وما تقلقوش برده ولا هطلب هدية و لا عيدية العيد
بس عشان تدعولى السنة دى ربنا يرضى عنى و يرزقنى بخطوات كبييييييييييرة لاهدافى
و مساعدة كمان معلش..
دلوقتى لو انا عاوزة اوصل رسالة معينة للغرب
فكرت اعمل بيج ع الفيس و لله الحمد واحدة صاحبتى قالتلى هتتقفل .. بس هعملها برده باذن الله
قلت حل كمان اعمل مدونة .. بس السؤال المدونة هتوصل للغرب ازاى؟؟
حل تالت .. اعمل جروب ع الياهو .. بس نفس المشكلة بتاعة المدونة .. بجانب انى اساسا ماتعاملتش كادمن مع جروب
ياهو قبل كده(بس ده مقدور عليه باذن الله)؟؟
الحل الرابع و الخامس و ...
هتقولهولى مش كده؟؟
بالله عليكم يا جماعة اللى عنده اى فكرة يقولهالى انا عاوزة اعمل اى خطوة فى العشرة الاواخر ..
و اخيرا .. ربنا يعيننا كلنا يارب ع الطاعة
و ربنا يتقبل يااااااااااااارب