الخميس، 25 مارس، 2010

فتح عينك ..!!

نقره لعرض الصورة في صفحة مستقلة

السلام عليكم و رحمة الله

هحكيلكو موقف بسيط كده حصل
اختى كانت عند دكتور العيون .. المهم قالها انها تغمض عينيها فترة
المهم اختى الصغيرة بتقول لماما
ماما هو لو أبلة ... (اختى) ساقت دلوقتى و هيا مغمضة ايه اللى يحصل؟
راح اخويا الجهبذ الصغير قايلها جملة مختصر للى هيحصل
دِش دِش دِش

جملة عجبتنى الصراحة و مختصرة
لو جينا نحلل الكلام ده
هو يعنى ايه انسان ماشى مغمض .. ايه الضرر يعنى؟
متهيألى الضرر الوحيد انه مش عارف هو رايح فين
و بالتالى هيحصل حاجة من 2
إما
دِش دِش دِش
أو
ان ربنا هيسترها و مايحصلش حاجة بس للاسف مش هنوصل للمكان اللى عاوزينه ولا لمكان اساساً

نيجى بقى فى حياتنا
لما نبقى ماشيين من غير هدف
يعنى مثلا
واحد بيذاكر .. بيذاكر ليه ؟؟
هو مش عارف
هو بيذاكر و خلاص
انما مافيش هدف أدامه .. هدف محدد يتحدى نفسه عشانه .. مش موجود للاسف
هييجى فى الاخر -غالبا- يسال نفسه انا استفدت ايه
غالبا مش بيحس بنتيجة او بفرحة النجاح -اذا نجح-
مع ان غيره ممكن يبقى نجاحه اقل منه بس فرحته بنجاحه اكبر
لانه عارف هو عاوز ايه
و عارف ان نجاحه ده لسة بداية للى بعد كده
واحد تانى بيدخل نت
ايه الهدف ؟؟
مش عارف
هو بيدخل و خلاص بلا هدف
الا كنوع من انواع قتل الوقت يمكن بس برده من غير هدف
فى الاخر
مش هيلاقى نفسه عمل حاجة
مع ان غيره استفاد من كل حاجة
واستخدم النت عشان يطور نفسه و يستفيد و جانب من الترفيه برده
بس حتى الترفيه لهدف
واحد تالت ماشى فى كل الاتجاهات
مرة شاعر
و مرة كاتب
و مرة محلل
و مرة شغلته الاساسية
و مرة ... و هكذا
ده شئ كويس جداااااااااا جدااااااااا ان يكون فى انسان كده
بس ياترى ايه الهدف ؟؟ ايه الهدف اللى يربط بين دول كلهم فى حياتك؟؟
لا شئ
اهى حاجات بتتعمل و خلاص
تمام جدا حاجات كويسة و ربنا يعينك عليها
بس هتيجى فى الاخر
محصلة الحاجات الكويسة دى كلها =صفر
لان مافيش مجموع للجهد اللى بتعمله
ولا فى اتجاه موحد لكل الاتجاهات دى
عارفين احنا لو ماحطناش هدف هنبقى عاملين زى ايه
زى المركب اللى سايب الموج يحركه
هو اه بيتحرك
بس للاسف مش عارف هو راح فين
و لا هيعرف يصطاد
و لا هيعرف يستمتع
ولا هيعرف مكان جديد
و لاهيكتشف مكان كويس فى البحر
ولا هيعرف يرجع لمكانه الاصلى عشان يبدأ من جديد
هيضطر انه يعمل بداية ليه من مكانه دلوقتى و يحاول من جديد و ربنا يعينه
لازم يا جماعة بالله عليكم
هدف اساسى نعيش بيه و ليه
تحته اهداف فرعية
تحتهم فرعيين اكتر
و هكذاااااا
عشان لو هدف من الاهداف الفرعية ماقدرناش نحققه و ده وارد جدا
نقدر نحط ليه بديل يساعنا فى الهدف الاساسى
حياتنا دى مش لعبة و مش هتتكرر
و لو جينا فى النهاية اكتشفنا اننا غلطنا فى حق نفسنا
مش هنرجع عشان نصلح
ديننا قال لازم يبقى فى نية فى العمل اللى بنعمله
و الا مش ليه لازمة
فين نيتك من حياتك؟
و نيتك من النت؟
و من الدراسة؟
و من طاعتك لوالديك؟
و من التزامك بالدين؟
و من عدم التزامك بالدين؟
و من لعبك؟
و من كلامك؟
و من علاقتك بالناس؟
و من زعلك من غيرك؟
و من حبك لغيرك؟
و من صداقاتك ؟


و من كل حاجة بتعملها فى حياتك؟؟؟؟؟؟؟

انا عارفة ان سنبة كبيرة هتقولى احنا كده مش هنستمتع مش كل حاجة تبقى محددة و مدروسة بالورقة و القلم
ولا احنا الة عشان نبقى محددين ده كله
كده مش هنخلص
امممممم اوك
مش ده كله
بس اللى تقدر عليه
و ع اد ما تحدد هدف فى كل حاجة فى حياتك
ع اد ما هتقدر تنجح فى حاجات كتير فى حياتك-بعد عون ربنا طبعا-

الثلاثاء، 23 مارس، 2010

السلام عليكم و رحمة الله


لكل فعل رد فعل .. و لكن!!

كثيرا ما ندرس مناهج فى مراحل ما قبل الجامعة .. و بمجرد دخولنا الجامعة نكتشف و فجأة ان ما درسناه .. فقط .. كان مرحلة تعليمية و ليست مرحلة علمية

تعليمية .. قد تكون بها أخطاء و قد تكون صحيحة .. و قد تكون هامشية و قد تكون أساسية.

قانون درسناه تم اثبات صحته .. لا للقوانين العلمية فقط .. انما أيضا للحياة بكل جوانبها ..

"لكل فعل رد فعل مساو له فى المقدار و مضاد له فى الاتجاه"

رأيت فى طلبة الجامعة (سوء أدب) مع أعضاء هيئة التدريس .. رأيت فيهم تجاهلا لقواعد الأخلاق و الذوق الرفيع .. بالطبع ليس الجميع .. هى فقط مجرد نسبة

و وجدت رد الفعل من أعضاء هيئة التدريس .. و أيضا ليس الجميع لكنها فقط نسبة كان رد الفعل جملة اسمعها كثيرا (دكتور الجامعة يعمل اللى هو عاوزه و افضلك بلاش تسالى ليه و ازاى!!)

رد فعل طبيعى ممن يفهمون العلم كثيرا و بديهى جدا تطبيقهم لقانون علمى بسيط اساسى كهذا ..

الجمعة، 5 مارس، 2010

محاولة لاستغلال وقتنا ..


السلام عليكم و رحمة الله

اكيد وقت كبييييييييير اوى مننا بيضيع فى المواصلات او مستنيين حد او مستنيين محاضرة ....الخ

و اكيد طبعا موبايلاتنا معانا .. طيب و هو ينفع يعنى يا جماعة نسيب الفرصة !!

مش لازم نبقى ناس استغلاليين -للوقت يعنى- ولا ايه رأيكم ؟؟

دى مجموعة كتب جميلة اوى للموبايل و نقدر نقراها فى اى وقت و كمان مساحتها صغيرة جداااااا









و ده موقع مخصوص لكتب الموبايل راااااااائع جدااا


و ده برنامج لتحويل اى كتاب لصيغة جار اللى هى تنفع لكل الموبايلات و معاه الشرح


و دى مجموعة كتب صوتية


و ممكن بقى لو حد بيراجع او بيحفظ القرآن مثلا يحمل القران ع موبايله و يسمعه كتير فى الوقت اللى بيضيع ده


ممكن كمان كاقتراح يعنى تحطو حلقات برامج مالحقتوش تسمعوها سواء دينية او تنمية بشرية او نقاشية (كل حد بميوله طبعا) هحاول باذن الله لو فضيت قريب ابقى احط شوية حاجات من اللى عندى


ياريت لو اى حد عنده اضافة سواء بكتاب او موقع يكتبها ..

جزاكم الله خيرا

بالتوفيق يارب للكل