الأحد، 26 أبريل، 2009

ليييييييه بنعمل كده؟؟؟؟




السلام عليكم و رحمة الله

ازيكم يا جماعة اخباركم ايه؟يارب يكون الجميع بخير

و الناس اللى فى الجامعة يكونو تمام

و اللى بيمتحنو ميد تيرم تكون النتيجة تمام

و الناس اللى بتشتغل يارب تاخدو حوافز و طبعا الناس اللى فى ثانوية يارب يارب تحققو احلامكم و ربنا يعينكم يارب ....شدو حيلكم

متهيالى كده مش نسيت حدادخل فى الموضوع بقى

الموضوع كله يتلخص فى سؤال ليه بنتعمد نجرح بعض؟


بس الاول قبل ما ادخل فى الموضوع عايزين بس نتفق ع حاجة اى حاجة عن الحب ممكن تيجى فى الموضوع انا بتكلم عن الحب عامة حب اقارب و اخوات و اصحاب و ممكن حد تانى بس الحب اللى مش يغضب ربنا

ارجع بقى تانى للسؤال ليه بنتعمد نجرح بعض؟

ليه يا جماعة لما يكون حد بنحبه و بيحبنا و حصل موقف حتى لو موقف جامد ليه مش بنسامح

طيب مش قادر تسامح ليه بتتعمد تجرحه

يعنى اوقات بنجرح غيرنا بدون قصد

بس ليه نتعمد و نفكر ازاى نجرح غيرنا خاصة لو غيرنا ده حد بنحبه

مش بنحط نفسنا مكان غيرنا و ع طول و بسرعة غيرنا غلطان و احنا اللى دايما صح و احنا اللى دايما مش بنغلط و نظلم غيرنا و مش كده و بس لا كمان بنتفنن فى الوسائل اللى تجرحه و لا كانه انسان

عمرنا ما بنعمل تبادل ادوار


طيب ايه رايكم تيجو كده نتخيل الموقفين

حد بنحبه و عارفين انه بيحبنا عمل موقف معانا بس موقف جامد شوية لا شويتين تلاتة

و مش قادرين نسامح اول موقف


اننا هتتعمد نجرحه كرد فعل لجرحه لينا او انه زعلنا

اوكى جرحناه

طبعا هيرد علينا بجرح او هيبقى احسن مننا و مش يرد الجرح ده

بس طبعا مادام احنا اصلا بنتعمد نجرحه فهنجرح تانى و تالت و لحد مانتعب بقى

و فى الاخر يحصل حاجة من 3 حاجات

لاما نكتشف ان الانسان اللى احنا عمالين نجرحه ده هو اكتر انسان حبنا و كان باقى علينا

لاما فى يوم هتكتشف ان الدنيا احقر من انك تعيشها عشان تجرح غيرك و تدمره و تعيش حياتك كلها فى مؤامرات كانك فى حرب

لاما هتكتشف ان الانسان ده مش يستاهل و لا ثانية تضيع من عمرك

و فى ال3 احوال مافيش حد هيندم الا انت

الموقف التانى

بقى اه هو جرحنا و كل حاجة و احنا مش قادرين نسامح ع الاقل فى الفترة دى بس هننسحب من حياة الشخص ده

ع الاقل لحد لما نهدى او اننا نواجهه و هتكون نتيجة المواجهة

اما انك تنسحب من حياته عشان مش تجرحه

اما انك تسامحه لانك مازلت بتحبه و هو كمان

احسن حاجة فى الموقف التانى انك هتكون عايش مرتاااااااااااح مافيش بقى التفكير بتاع هدمره و والله لاجرحه و لو مش اتجرح بطريقة فى 176474826748طريقة


حاجة بقى عايزة اقولها للناس اللى بتحب تجرح غيرها

و الله العظيم الدنيا مش مستاهلة ابدااااااااااااااا انك تعمل كده و لا انت هتتحمل حسرة انك تيجى فى اخر عمرك و تكتشف ان حياتك كلها ضاعت فى لا شئ و لا هدف

و بعدين ده حد كنت بتحبه فى يوم من الايام ليه تحول الحب ده لكره

انسحب من حياته و خليه هو كمان ينسحب من حياتك

مش لازم تكملو مادام لاقيتو الحب بيختفى حاولو تحتفظو بالباقى منه و بلاش تجرح حد لانك مش هتستحمل حد يجرحك

و كما تدين تدان

و برده جملة للناس بقى اللى بتتجرح

"ابتسم فلا احد يستحق دموعك و من يستحقها فلن يجعلك تبكى"

بجد لو حد حبك او عارف انك بتحبه و مقدر ده منك و الله ما هيجرحك و لو حصل بدون قصد مش هيستحمل جرحه ليك و هيخفف الجرح ده بكل طاقته

ماتبكيش ع اللى بايعك و لا اللى مش يستاهلك بس

فى نفس الوقت اوعى تظلم حد

و اعرف ان اللى يتعامل معاك و يفهمك غلط اما انه عايز يفهمك غلط و اما انه مش قادر يفهمك

فما تتعبش نفسك كتير

ما فيش انسان الكل هيرضى عنه و لا فى انسان هيكسب حب الكل

الأحد، 19 أبريل، 2009

مابين الواقع و الخيال...عالم النت



السلام عليكم و رحمة الله


ازيكم يا جماعة ؟ عاملين ايه ؟

يااااااااااارب تكونوا بخير ياااااارب
ندخل فى الموضوع
ايه رايكم فى النت؟
النت بكل حاجة فيه
منتديات..شات-ع الميل مش غرف الشات-..معلومات..ابحاث..دراسة.......و برده المدونات..يعنى كل حاجة
هو النت فعلا لو مش دراسة او علم يبقى مضيعة للوقت؟؟؟؟
اوقات كتير بفكر هل لو د\احمد زويل و هو ادنا كان النت منتشر زى دلوقتى
هل كان هيستخدمه زينا كده؟
و لا هيبقى للعلم فقط؟
و لا مش هيستخدمه اصلا؟
تعالو نتكلم بتنظيم اكتر
اولا بالنسبة للمنتديات
من وجهة نظرى
المنتدى بالنسبة لى مكان بتناقش فيه مع عقليات مختلفة
اكيييد بستفيد من المناقشة سواء كانت مناقشة سياسية او اجتماعية او ايا كانت
بتنمى عندى اسلوب الحوار .. الاقناع......كده
برده بقول فيه حاجات من وجهة نظرى نصيحة تفيد غيرى
بجانب ده سهل جدا انى اعمل حاجة للدين خلاله
بس اوقات بخاف ان ده يكون غلط
اقولكم حاجة بمنتهى الصراحة
انا خايفة ييجى عليا لحظة بعد كام سنة
اقول ايه اللى انا ضيعته ده
خايفة ييجى يوم اقول ايه اللى استفدته و اثر فى حياتى
و خايفة اكون ضريت نفسى اكتر ما افدتها
من رايكم انتو بقى
ايه هو عالم المنتديات بالنسبة لكم؟
ازاى بتستفيدو منه كويس؟
هل انتو زى حالاتى كده بتخافو تكونو بتضيعو عمركم ع الفاضى؟
تفتكرو لو احنا شغلنا نفسنا بحاجات تانية هيكون افضل؟ و لا مادام بستفيد يبقى خلاص؟
و السؤال اللى سالته فوق
واحد زى د\احمد زويل تفتكرو كان ممكن يشترك فى منتدى و يشارك فيه ؟
بالنسبة للميل بقى
عندى ماما دايما تقولى الميل ده "قعدة مصطبة"
دايما تقولى بتقعدو تتكلمو و مش بتتحركو
و البلد مش عايزة كلام
و فلسطين مش عايزة جدال
بس انا فى حاجة تانية بتشغلنى فى موضوع الميل و التعارف من عليه
تفتكروا يا جماعة الناس اللى بنتعرف عليهم فى الميل
ناس وهمية و لا عادى هما هما الناس اللى بنعاملهم فى حياتنا
تفتكرو كلام الميل كلام كيبورد من و را شاشة و ماحدش شايف حد
و لا ربنا شايفنا كلنا و الناس مقدرة ده
هل فعلا النت تنطبق عليه مقولة "دنيا الاقنعة"
الحاجة التالتة فى النت
المدونة
متهيالى المدونة الى حد كبير شبيهة بالمنتدى
بنطرح فيها افكارنا و بناقش بعض و بنستفيد من بعض
******************

و انا بكتب الموضوع اكتشفت ان انا حاطة كلمة مناقشة كتيييييير
بس هقولكم السبب
انا بحب المناقشة جدا فى كل حاجة فى الحياة يمكن عشان اتاكد ان اللى بعمله صح و يمكن عشان اوصل للحقيقة
مش عارفة
و للاسف
غالبا مش بلاقى اللى يناقشنى بعقلانية فى الحقيقة - فى حياتى بره النت يعنى-
عشان كده بحب النت
بس تفتكرو ده غلط؟؟؟؟
**************************
نرجع بقى لعنوان الموضوع
تفتكرو النت واقع و لا خيال و لا بينهم هما الاتنين؟؟؟؟؟

الأربعاء، 8 أبريل، 2009

خطوط حمراااااا



السلام عليكم و رحمة الله


اول خط احمر

هل السياسة فيها مشاعر و لا لأ؟؟؟


دايما اسمع كلمة : السياسة مافيهاش مشاعر

فى حصار غزة

لما نقول مش عايزين معاملة لا سياسية و لا اقتصادية و لا اى نوع معاملة بيننا و بين اليهود

يقولولنا السياسة مافيهاش مشاعر

مصير البلد مافيهوش مشاعر

لازم نخلى عقلنا يحكم مش مشاعرنا

و الشعب يتكلم بس الحكومات تنفذ اللى هيا شايفاه صح


و كان اخر موقف سمعته من مواقف السياسة التى لا تراعى المشاعر

انهم ناويين يحولو غرفة نوم الرئيس صدام حسين لغرفة نوم لشهر العسل لمن يدفع الثمن


و طبعا ده فى مصلحة البلد

هيوفر دخل كويس

و هيعمل سياحة

و طبعا كرامة شعب كامل .. لا مكانة لها .. لان السياسة مافيهاش مشاعر

بغض النظر عن صدام و عن اللى حصل ليه فى اخر فترة و مدى اهانة الشعب العربى كله مش العراقى بس

ازاااااااااى الحكومة العراقية توافق ع ده

او حتى الحكومات العربية

ازاى يعنى الاهانة دى تحصل و يكون الرد

اصل السياسة و مصلحة البلد مافيهاش مشاعر

انهى مشاعر؟؟؟؟؟؟؟؟
مشاعر شعب كامل مالهاش مكان فى سياسته

امال ازاى بلده

و ازاى الحكومة بتمثله

هو مش لازم برده يكون فى توفيق بين عقل الحكومة و عاطفة الشعب و لا اييييييييييييه؟؟؟؟؟؟؟؟


الخط التانى..اتمنى قصدى يتفهم صح بالله عليكم


مسلم و مسيحى


مبدايا

انا لا اهدف الى اى فتنة طائفية فى بلدى

بس انا بجد من فترة و نفسى اتناقش فى الموضوع ده

هل علاقة المسلم بالمسيحى علاقة ضعف؟و لا علاقة حرص؟و لا علاقة خوف؟و لا علاقة تعاون؟و لا علاقة مسايرة؟و لا علاقة مصلحة ؟و لا خوف على البلد ؟و لا حسن تعايش -زى ماديننا وصانا-؟..صراحة مش بحب اوصفها بالاخوة بس هستنى رايكم انتو فى الوصف اللى هتختاروه.......

احنا فى مصر كل حاجة تحصل بين المسلم و المسيحى

بنخاف اوى منها

دايما نقول الغرب عايز يعمل فتنة طائفية

كتيييير يقولو المسيحيين اخواننا و المسيحيين يقولو المسلمين اخواننا

بامانة و بمنتهى الصراحة

انتو حاسين بده

صراحة انا مش حاسة كده مش عارفة ليه

يعنى من وجهة نظرى او اللى انا مطبقاه فى حياتى

فقط حسن تعايش زى ما دينى وصانى

يعنى مابقولش على المسيحى اخويا

المسلم هو اللى اخويا

انما المسيحى لا

مش تفرقة

بس ده مسلم دينى و دينه واحد

رابظة اقوى من الدم بيننا

المسيحى ليه عليا حسن المعاملة

مش مطالبة باكتر من كده

انا مش هكتب كتير فى الجزئية دى بس اتمنى اللى عايزة اقوله يكون وصل

و بكرر

اولا

اى راى ده رايى الشخصى مش راى الدين

ثانيا

ماقصدش ابداااااااااا اى تفرقة عشان لو الكلام اتشاف غلط مش مسئولة













الجمعة، 3 أبريل، 2009

ألم و أمل.....لماذا؟؟؟


السلام عليكم و رحمة الله
اول موضوع ليا فى المدونة حاباه يكون سبب الاسم
ليه "ألم و أمل"
الالم فى حياتنا كتيير اوى
فى حال الشباب الم
بس الامل انهم يفوقو و ينصرو دينهم
صدمة فى حياتنا ألم
بس الأمل اننا نتعلم منها و بجد الخير لسة جاى (ربنا ما بيعملش حاجة وحشة ابداااااا)
فراق ناس بنحبهم ألم
بس الأمل فى ناس لسة هنعرفهم
و كمان جميل اوى ان الفراق ده يتم بس و احنا محترمين بعض
حال اخواننا فى فلسطين ألم كبييييير
بس الأمل فينا و فى رجوعنا للدين و فى فهمنا للواقع صح
حال مصر ألم
الأمل - و الله موجود-فى كل شخص فينا
فى كل شاب و كل بنت
فى كل طالب و طالبة
بلاش نستقل نفسنا و الله احنا كويسين جداااا بس نحدد هدفنا
و فى النهاية
تصادم السحاب بيبقى ألم
و الأمل فى المطر اللى بينزل نتيجة ده
الاااااام و اماااااااال فى حياتنا كتيييير محتاجة التحدى
لازم نتحدى الامنا عشان نحقق املنا
لازم فى كل الم ندور ع الامل
عارفة اننا مش بنبقى بنفكر فى اى حاجة الا الوجع اللى فينا
بس مش لازم نسيب نفسنا لده
بجد ده مش كلام
و الله كل كلمة لنفسى اولا