السبت، 2 يوليو، 2011

أشعة شمس


دائما ما أرمز لمشاكل الحياة بأمواج البحر و أتساءل لم نتمتع بأمواج البحر و نتخطاها بكل متعة و تحدى و نقف أمام مشاكل الحياة حائرين مضطربين ؟!!
اليوم كنت أنظر لأخوتى يلعبون و يضحكون .. يسبحون فى البحر للأمام متخطين أمواجه بكل تحدى
نظرت للشمس فوجدتها رائعة تبعث أشعتها الحمراء المزخرفة باللون الذهبى فى كل مكان بشكل ذكرنى بالإنسان ذو البصمة الرائعة في من حوله فهو أيضا تمتد أشعة تأثيره الذهبية لتصل لمن حوله فتبهجهم
(بعد إختفاء الشمس وجدت الدنيا مازالت مضيئة بنورها , ليس كما كان و لكنها مضيئة , و هذا بكل وضوح بصمة الشمس)

أحسست بالشمس و كأنها الحياة , فعدت مرة أخرى لتشبيهى الأول فكما أن أمواج البحر ملونة بلون الشمس الأحمر الذهبى فمشاكل الحياة ملونة بطبيعتها الفانية
بعدها بقليل وجدت الشمس تغرب و اللون الأحمر الذهبى بدأ يختفى و كأنها إشارة من الله أن كل شئ تمرون به تستطيعون رؤيته بشكل آخر غير ما ترونه .. و فى كل الأحوال فإنه حتما زائل أو نحن الزائلون ..

حمداً لك ربى,,




شموخ مسلمة
1\7\2011
06:46pm

الأحد، 17 أبريل، 2011

لحظة تسامح


السلام عليكم و رحمة الله


يارب تكونو كلكو كويسين و بخير و نجاااااااااااح و سعاااااااااااااااادة ,, يااارب


كنت كل فترة اقف مع نفسى وقفة و اقرر انى اسامح الكل ,, بس صراحة ॥ كان فى ناس مابحبش افتكر هما عملوا فيا ايه عشان لو افتكرت ماظنش انى هقدر اسامح!!

و من فترة قررت قرار ألا و هو

انى سامحت كل حد عمل فيا اى حاجة مسامحة بجد فى الدنيا و فى الآخرة و قررت كمان انى باذن الله مش هزعل من اى حد تانى خالص

:::::::::

من اول مرة سمعت فيها جملة "وراء كل سلوك نية إيجابية " و انا بحاول أدقق شوية فى دوافع الناس

لاقيت ان كل حد بيتصرف من رؤيته بدافع ما ,,

انا شايفة انى من حقى ادافع عن نفسى ضد فلان لانه هيتكلم عليا كلام مش كويس فهسبقه !

غلط اه ॥ بس فى دافع ,, ليه ما نحاولش نصحح الدافع فيتصحح السلوك تلقائيا ؟

:::::::::

كنت اوقات اقول هما ليه الناس كده ؟ ليه الناس مش بيراعو مشاعر اللى ادامهم و ... الخ

و فوجئت ان نفس الناس بيقولو نفس الكلام!!

الغلط فين ؟؟؟؟

هل لأن كل واحد فينا شايف نفسه ملاك؟؟

ولاّ

لأن كل واحد فينا شايف اللى ادامه شيطان ؟؟؟؟

:::::::::::::::::::

فعلا الناس طيبين اوى بس برؤيتهم ,, و كلنا -فى الغالب- فعلا لو لاقينا اللى بيحس بينا -برؤيتنا احنا مش رؤيته هو- هنبقى ملايكة -ع الاقل فى التصرف البشرى بيننا -

حاولو تتعاملو من المنظور ده و بلاش نعتقد اننا ملايكة و معصومين من الغلط

حضرتك مش ملاك زى ما الآخر مش ملاك ,,

زى ما غيرك جرحك انت جرحت كتير ॥ حتى لو بدون قصد ॥ ليه نجزم ان الآخر متعمد يجرحنا ؟

الناس اطيب من كده بكتييييييير ,, ممكن انت تكون محسسهم بعدم الامان تجاهك فتصرفاتهم معاك مش كويسة لانهم اصلا خايفين منك!

ممكن-و ده غالبا- حصل سوء فهم و كرامتك منعتك تبرر ॥ و الآخر برده كرامته منعته يبرر ॥ ليه تلومه ع فعل انت سبقته بيه؟؟

::::::::::::

فكرت مرة فى لحظة ما بعد وفاتى ,, و تخيلت الناس هتقول عليا ايه ,, أو انا احب انهم يقولو عليا ايه ؟؟

و قررت من ساعتها انى باذن الله اكون سبب فى بسمة كل حد اتعامل معاه او حتى يشوفنى-بقدر استطاعتى- ,, و كنت فى البداية معتقدة ان الموضوع ممكن يقابلنى فيه صعوبات ,, بس الموضوع طلع سهل جدااا -الحمد لله-و ابتسامة الناس و حبهم سهل اوى اوى اوى

::::::::::::

يا جماعة و الله الدنيا فعلا مش مستاهلة اننا نزعل من بعض او نتفنن فى زعل بعض و لا اننا نقول "و الله مش هسامحه"

كل واحد فينا عنده هموم كتير اوى ليه بنزود همومنا بحاجة مش مستاهلة اصلا؟!!

حاولو تفتكرو للناس حاجة كويسة فيهم سواء فعل او تصرف ,, و اكيد هتلاقو


:::::::::::::::::


قال ابن القيم-رحمه الله-

يا ابن آدم إن بينك و بين الله خطايا و ذنوب لا يعلمها إلا هو

و إنك تحب أن يغفرها الله لك ,, فأغفر أنت لعباده

و إذا أحببت أن يعفوها عنك فاعفو أنت عن عباده

تعفو هنا يعفو هناك ,, تنتقم هنا ينتقم هناك ,, تطالب بالحق هنا يطالبك بالحق هناك


:::::::::::::::


اللهم إنى تصدقت بعرضى على الناس و عفوت عمن ظلمنى فمن شتمنى أو ظلمنى فهو فى حل ,, اللهم إنى سامحت كل من اغتابنى أو ذكرنى بسوء فى غيبتى و اسألك فى ذلك الأجر و المغفرة و بلوغ مراتب المحسنين

اللهم أيما عبد أو أمة من أمة محمد صلى الله عليه و سلم اغتابنى أو ظلمنى أو بهتنى أو قذفنى أو قال فى ما ليس فى ,, فإنى قد عفوت عنه و تركتها له

الأربعاء، 16 مارس، 2011

حوار الساعة .. التعديلات الدستورية !!






السلام عليكم و رحمة الله





حوار الساعة ॥ التعديلات الدستورية !!





قبل ما اقول رايى ॥ هقولكو حاجة انا ملاحظاها و فرحانة بيها اوى


غير ان لاول مرة بنحس ان صوتنا مسئولية فعلا


مش ملاحظين ان الناس بقت -الى حد ما- متقبلة اختلاف الاخر و حرية رأيه ؟





:::::::::::::


نعم او لا ؟


نعم للتعديلات الدستورية


مع العلم ان مش متفقة معاها بنسبة १०० %


لكنها مفاضلة ,, بمنتهى البساطة و باختصار شديد


لو قلت لا ,, هنروح لنقطة المجلس الرئاسى ॥ و لحد دلوقتى مافيش ميكانيكية واضحة ليه ॥ و لا فى تحديد للانتخابات البرلمانية فى الاحتمال ده ॥ بجانب ان نتيجة لا غير واضحة بشكل كافى


يعنى الجيش قال ان نتيجة نعم او لا مصر فى امان و مافيش خطر ॥ تمام جدا


و كمان معناه ان الجيش هيعمل اعلان دستورى بدون استفتاء و هنا وقف وصف ما بعد لا


هل بعد لا هيكون تنفيذ اللى احنا قلنا لا عشانه ؟ ولا حاجة تانية خالص و ندخل فى سلسلة(لاءات) غير متناهية





لو قلت نعم ,, هنروح لنقطة ان الانتخابات البرلمانية هتتم قبل الرئاسية و فى الواقع انا اقتنعت بكده لان لو الرئاسية تمت قبل البرلمانية كده البلد هتبقى كلها فى ايد شخص واحد لحد ما الانتخابات تحصل (مع انى اتمنى ان الرئيس القادم و البرلمان القادم تتعملهم فترة استثنائية متمثلة فى سنتين مثلا و بعدين تتعاد الانتخابات تانى)


كمان هنروح لنقطة ان الرئيس القادم هيبقى معاه سلطات كتير و ماحدش ملاك انه يتنازل عن سلطاته دى و حتى لو قلنا انه ملزم انه يعمل دستور جديد فهو غير ملزم بالتعديلات اللى احنا عاوزينها ॥ يعنى ممكن يعمل دستور جديد و يبعد عن اللى احنا اصلا عاوزينه ,, و فكرة الثورة هنا مش مضمونة بجانب احنا ليه نحط نفسنا فى موقف الثورة ما نظبط كله من الاول


بس بمنتهى البساطة


الرئيس اللى مش هيعمل حساب للشعب قادر يغير الدستور الجديد اللى احنا عاوزينه يتعمل دلوقتى ॥ هقتولولى هو لوحده فى البلد ॥ يبقى احنا كده جاوبنا ع نفسنا !





ملحوظة :


-بعتذر مقدما لان الردود -غالبا- مش هقدر اعتمدها نظرا لانى مش هيكون عندى نت لحد يوم السبت تقريبا


-الموضوع لا يمثل كل الاحتمالات من نعم ولا ॥ لكن الاساسيات من رايى لان للاسف لا املك وقت كافى لاكتب كل شئ

لكن لمن يريد ان يقرأ مواضيع -باسلوب افضل - تؤيد (نعم)



مدونة البتاعة ,, رأيى فى التعديلات الدستورية

مدونة هكذا عاملتنى الحياة ॥ قرب ,, قرب ,, تعديلات ,, تعديلات

و اخيرا
ربنا يحفظ مصر
::::::::::::::::
ع الهامش
انا صوتت ب (لا) و ده القرار اللى وصلتله يوم السبت الفجر
لانى عرفت ان الجيش هيعمل دستور جديد قبل الانتخابات فى حالة (لا)
ربنا يحفظ مصر و كل البلاد الاسلامية و العربية ياااارب

الخميس، 17 فبراير، 2011

ممكن طلب ؟؟



السلام عليكم و رحمة الله

يارب يكون الجميع بخير ,, و الحياة تكون سعيدة و ياااارب نكون بدانا نرجع لحياتنا الطبيعية بانجازات اكتر
معلش هو ممكن الموضوع غريب شوية
بس كنت عاوزة اسأل حضراتكم عن الآتى :
ايه افضل الكتب اللى حضراتكم تعرفوها ل
د\عبدالكريم بكار
د\طارق السويدان
الشيخ محمد حسان
الشيخ محمد حسين يعقوب
الشيخ محمود المصرى
الكاتب محمد حسنين هيكل
الرافعى
و ايه أفضل الكتب فى المجالات الاتية
الكتب الدينية
الفلسفة
الفكر
علم نفس
سياسة
تربية او نفسية الطفل
الاعجاز العلمى فى القرآن
التاريخ
جغرافيا و تاريخ ايطاليا
و ايه افضل الكتب اللى حضراتكم قرأتوها عموما ॥ مع اسم الكاتب ॥
جزاكم الله كل خير مقدما

السبت، 12 فبراير، 2011

أ.د. عبدالكريم بكار


السلام عليكم و رحمة الله

مش عارفة ليه حاسة و بقوة انى بمجرد ما اعمل الموضوع ده هبقى اخدت خطوة ايجابية

أولا و قبل ما انقل اى كلام عن د\عبدالكريم بكار

بجد لو بنتكلم ع الأب و المفكر و المعلم و القدوة و المحرك و المربى و اكتر من كده

اكيد هنبقى بنتكلم ع د\عبدالكريم بكار

بتضايق اوى لما الاقى ناس كتير مش عارفاه و سبب مضايقتى هتعرفوه لما تسمعوه او تقروله

من هو أ.د. عبدالكريم بكار

الصفحة الرسمية ل أ.د.عبدالكريم بكار

كتاب عصرنا و العيش فى زمان الصعب (من اروع الكتب اللى قرأتها)
كفاية كده .. اتمنالكم متعة و افادة و نهضة شخصية تؤدى لنهضة فى البلد
::::::::::::::::::::::
طلب : ياريت لو حد يعرف مواعيد برامج د/ عبدالكريم يكتبها ..
جزاكم الله خيرااا

الجمعة، 11 فبراير، 2011

تحيااااااااااا مصر


السلاااااااااااااااام عليكم و رحمة الله و بركاته
"ليس لها من دون الله كاشفة"
"ليس لها من دون الله كاشفة"
"ليس لها من دون الله كاشفة"
مبروووووووووووووووووك لكا مصر و كل المصريين
باذن الله ده الخير
باذن الله
باذن الله
كل اللى كانو مش مؤيدين اكمال المظاهرات (و انا زيكو) .. احنا دعينا ربنا .. و قلنا ياااااااارب اكتب الخير
ده الخير باذن الله
بس علينا دور كبيييييييير .. الشباب اللى نزل مظاهرات بذل كتيييييير
و الدور علينا نبذل اكتر
و زى ما الحرية ليها ثمن غااااااااااالى
فالنهضة ثمنها غاااااااااااااااااالى
تحيااااااااااا مصر
تحيااااااااااا مصر
تحيااااااااااا مصر
اللهم اجعل مصر بلد الأمن و الأمان .. اللهم اجعلها بوابة نصرة الإسلام
امين يارب
مبروووووووووووووووووووك مرة تانية
مبروك أ\ماجد
مبروك واحد من الناس
مصر مستنياكو ترجعو و تعمروها
و مستنيانا كلنا نبقى ايد واحدة

الثلاثاء، 8 فبراير، 2011

ممكن نتناقش؟؟


السلام عليكم و رحمة الله
مبدأيا يا جماعة
كلنا متفقين اننا كلنا بنحب مصر
و كلنا بلا استثناء عاوزين مصلحتها بس من وجهة نظرنا و ده سبب الاختلاف فى الرأى(مش فتنة)
أولا يا جماعة الكلام غالبا مش مرتب .. فبعتذر مقدما
ثانيا: اتمنى كلامى يتفهم صح .. و اتمنى ان الرد يكون فكر بفكر .. و اتمنى اتمنى اننا قبل ما نتناقش نحاول نكون حياديين عشان نقبل نفكر فى الفكرة نفسها
ثالثا: الموضوع احتمال يطول .. انا فعلا مش عارفة هكتب ايه لحد اللحظة اللى بكتب فيها الجملة دى ..
و قد يرى البعض ان كلامى مستفز (لاختلاف الرأى) بس فعلا لا اقصد انى استفز اى حد !
و أخيرا : الحاجات اللى هتكلم فيها (مرتبة تصاعديا حسب الأهمية)
1- فكرة المؤامرة !
2-صفحة كلنا خالد سعيد!!
3-الريس يتنحى دلوقتى و لا يكمل فترته؟؟
::::::::::::::::::::
المؤامرة !!
مبدأيا انا اقتناعى بنظرية المؤامرة عموما قد لا تتعدى 25%
اما بالنسبة لفكرة المؤامرة فى الموقف الحالى تقريبا مش هتجيب 5 او 10%
و الله العظيم ده مش تشكيك فى وطنية اى شاب نزل المظاهرة
ولا تشكيك فى عقولهم او نضجهم
ولا بقول مسيسين
بس انا هذكرلكم مثال ذكرته قبل كده هيوضح فكرتى
(لو ليا واحدة صاحبتى قالتلى تعالى نروح نتبرع بالدم فانا رحت معاها بنية انى مساعدة الناس و عمل يقربنى لربنا و انى اكون ايجابية فى مجتمعى و لما انا خرجت كانت هيا متفقة مع ناس سرقو بيتى او موتو اخواتى او ...الخ
انا هنا حد كويس جداااااا
و طبعا استحالة ييجى فى دماغى ان حد يفكر التفكير الشيطانى ده
الخلاصة يعنى .. وارد ان يبقى فى مؤامرة حتى لو مش فى بداية المظاهرات ففى الحال حاليا أو مستقبليا)
ممكن حد يعتبر المثال ده فيلم عربى قديم !
بس ليه ننسف نظرية المؤامرة كلها مع اننا بنثبت المؤامرة لكل النظام السابق و الحالى متمثل فى رئيس الوزراء أحمد شفيق (اللى الكل بيشهد بنزاهته) و نائب الرئيس عمر سليمان (و اللى انا اعرفه انه كان من اكتر الناس اللى مرشحين للرئاسة من قبل الشعب قبل ما ده يحصل) .. مع ان الصهاينة اولى بالمؤامرة فى جميع الأحوال !
طيب لو فرضنا ان فى نظرية مؤامرة بنسبة 0.01 % ده المفروض يخلينا نحسبها كويس لان الموضوع مش بس بقى بيننا و بين النظام !
ييجى مع نظرية المؤامرة معركة (الجمل) اللى حصلت تانى يوم خطاب الريس
الكل قال ان الريس كان خطابه عاطفى عشان يخاطب بيه الشعب و يأثر ع عاطفته
و بالفعل استجابت نسبة مش قليلة للعاطفة دى او للخطاب نفسه
هل هو غبى لدرجة انه يستفزهم تانى و يستفز كل الناس اللى سابت التحرير ؟
هل هو بالغباء اللى يخليه يعمل حاجة زى كده ادام العالم كله ؟؟
هتقولولى امال ايه اللى كان بيعمله فينا قبل كده
هنا مختلف لسبب بسيط .. الريس كان كلامه انه هياسب اللى عمل و ... الخ من الوعود اللى تثبت -او تحاول تثبت- حسن نيته
ييجى فى اقل من 24 ساعة ينفيها كلها !!
مش قادرة اقتنع بدى
اما بالنسبة للدولة الصهيونية و موقفها
موقفها واضح ادام الكل عاوزين حسنى مبارك و طالبت العالم بالوقوف بجانبه
و ده طبعا اكد للكل انه عميل صهيونى
بس السؤال
هل الصهاينة اللى الكل عارف كم عمليات الاغتيال اللى حصلت لمجرد نشر البروتوكولات
او معرفة اى عميل ليها
هتطلع كده بمنتهى السهولة ادام العالم و هى شايفة الشعب مش طايقه ولا طايقها طبعا
و تقول لا
سيبوه اصله عميلنا !!
و الله حاولت اقتنع و اقنع نفسى بشتى الطرق مش قادرة اقتنع
ازااااااااى؟؟
طيب تقولى ايه فى موضوع تصدير الغاز؟؟
انا عارفة انها اسود حاجة فى تاريخه و دى كفيلة انه يرحل بقى و يسيبنا و يسيب البلد تعمل لنفسها تاريخ ابيض كله
بس موقف اسرائيل ده بالنسبة لى بيأكد ان فى حاجة مش واضحة
يا جماعة انا لما بتكلم ع المؤامرة و الله مش قصدى اشكك فى اى شاب من اللى فى التحرير .. بس اسمحولى افرض ان فى احتمال للمؤامرة .. فى حالة اننا كملنا و مش عاملين حساب لده ... اظن النهاية هتكون مش زى ماحنا حابين
:::::::::::::::
صفحة كلنا خالد سعيد
اولا
انا احترمت وائل غنيم لما سمعت كلامه
و احترمت احساسه
و احترمت انه حد حاسس بذنب مش ذنبه
و احترمت انه مدح فى ضباط الشرطة مع انه لو مش كويس كان بهدلهم
و احترمت جدا انه قال ان زوجته امريكية مسلمة
تمام؟
كلامى بقى اللى جاى مش سوء ظن
و ماحدش يقولى استغفرى
لانى مش بعمل فتنة انا بقول شكوك
احنا دلوقتى مش بنتكلم ع شخص مستقل فى حد ذاته و عمالة اقول فى شكوك كذا و كذا و كذا
انا بتكلم ع شخص سبب فى حاجات حلوة كتيييييييييييييييييييير حصلت لبلدى
و الموقف من اوله لدلوقتى سياسى و محتاج يتحلل
ماينفعش بقى ما نحللهوش و نقول عشان مانسيئش الظن بحد
فياريت اللى يرد عليا هنا بالذات يرد عليا كلام يقنعنى و اتمنى و الله انى اقتنع !
دلوقتى وائل اُعتقل 12 يوم
البيدج كان مين مشغلها ؟
قالو صاحبه اردنى
(نحديث: وائل غنيم ذكر فى البيدج من شوية ان اللى كان بيكتب مجموعة شباب اخدو منه الباس وورد يوم 25 و طبعا شباب وطنى يحب مصر و هنا يتجدد سؤال النت كان مفصول دخلو ازاى؟ و لو فعلا فى مناطق كان بقدر ربنا فيها نت ميدان التحرير اللى هما اصلا فاصلين النت من مصر بسببه هيبقى فيه نت ازاى؟؟؟؟)
طيب
اولا ليه ماقالش؟؟ (قالو برده ان عشان الناس ماتقلقش او ماتتراجعش ؟؟ و ده كلام غير منطقى تماما لان الصفحة كل اخبارها مين اتقتل و مين اتعذب و الجمال و الخيول و ... الخ بجانب ان المظاهرات خلاص باينة جدا انها مش هتتراجع لشخص بالعكس ده كان هيبقى مبرر انهم يطالبو بخروجه )
ثانيا
هل صاحبه الاردنى برده اوقات قطع النت من مصر هيقول انا داخل ديال اب؟؟؟
و هل صاحبه الاردنى برده هيقول انا دلوقتى فى التحرير و هروح اسلم ع امى و ارجع؟؟
و هل صاحبه الاردنى برده هيقول انا دلوقتى نازل التحرير و هكمل فيه النهاردة ؟؟؟؟؟؟؟
ازاااااااااااااااااااااااااااى؟؟؟
انا دماغى هتنفجر من انبارح بسبب الافكار دى
احنا قلنا الحكومة كارثتها ان مافيش وضوح و شفافية
نفس الحاجة انا شايفاها دلوقتى فى بيدج خالد سعيد
وائل بكى انبارح و ابكى الكل .. ماحدش قال عاطفة!
الكل بيقول وائل قال همشى و مشى و الريس لا .. و بالتالى الريس يخسر
لكن ايه وجه المقارنة ؟؟
وائل مشى من برنامج .. مافيش نتائج سلبية نهائى هتترتب على انه يسيب البرنامج
الريس هيمشى من بلد (لو فرضنا ان فى احتمال 0.001 % انه خايف عليها من احتلال او غيره) فى نتائج سلبية هتترتب و لو احتمال!
ثانيا
شبكة رصد و معروف طبعا انها اتعملت عشان مظاهرات مصر
هل من المنطقى يا جماعة ان تتعمل بيدج بمراسلين و صور فقط لمتابعة يوم واحد مظاهرة سلمية
(الكل كان متفق ان المظاهرة هتكون سلمية و ما قرروش انها تستمر غير بعد غباء الامن اللى حصل ليلة 25)
و هل صفحة كلنا خالد سعيد مش كفيلة بده؟؟
::::::::::::
رحيل الرئيس مبارك
اولا
انا متاكدة ان الريس ماينفعش يبقى رئيس لينا تانى
مش هقول اى مساوئ او مميزات ليه
بس يكفى ان الثقة اتعدمت تماما بينه و يبننا و لينا حق فى كده
ثانيا
بالنسبة خطابه العاطفى
اقسم بالله انا لما سمعت خطابه اصلا ماخدتش بالى من الجزء العاطفى اللى فيه لانى و بمنتهى البساطة سمعت الخطاب سمع اختيارى بمعنى انى كنت مستنية اسمع القرارات فقط
هيتنحى ولا مش هيرشح نفسه ؟؟
المجالس ؟؟
و هكذا
و بعد ما خلص ادركت انه ماقالش حاجة عن الطوارئ !!
بكيت عليه ؟
اه بكيت عليه بس بعد الخطاب لما سمعت المكالمات و اخدت بالى من كلامه بس كنت قبلها كونت رايى
هو يستحق البكاء ده ؟؟
الله اعلم بقى
عمل حاجات كويسة
و قصادها عمل بلااااااااااوى
السؤال :الريس يتنحى دلوقتى ولا لا؟؟
انا شايف انه مايتنحاش دلوقتى
لكذا سبب
اولا
التغييرات الدستورية ماحدش من حقه يغيرها الا هو .. هنقول هنكون لجنة .. امتى هتتكون او فى فترة زمنية اد ايه ؟؟
حال البلد خلال الفترة دى هتكون ايه؟
ثانيا
مين هيمسكها
النائب؟؟
طيب المتظاهرين مش كلهم موافقين ع كده
و انا سمعتها بنفسى و اكيد فى اليوتيوب دلوقتى
رافضين تماما السيد عمر سليمان لانه دلوقتى بقى بيمثل النظام اللى هما رافضينه
يبقى لو مسكها النائب البلد مش هتهدى برده !
بجانب
الكل بيقول يتنحى و خلاص الناس هتروح
لا الناس مش هتروح
لان بمنتهى البساطة هيطالبو بمحاكمته و برده تقدرو تسمعوها فيديو
طيب ماهو من حقنا يتحاكم ؟!
مش هتناقش فى الفكرة دى
بس انا شايفة ان اى رئيس محترم لاى بلد محترمة المفروض فى اخر عهده يعمل حاجة زى فكرة كشف حساب بمراقبة الشعب
الفكرة مش هنا .. الفكرة ان دى كلها خطوات مش محسوب زمنها و مش محسوب نتيجتها و اللى بيتكلم مفترض ان الكل هيوافق عليها و ده مش صحيح !
قولولى بقى مين الريس بعده؟؟
و مين الحكومة؟
هنكون حكومة ائتلافية .. ماعنديش اى مانع و الله
بس برده هنرجع للزمن هتاخد اد ايه
هل البلد هتقعد فترة اد ايه مافيهاش حكومة ؟؟ و هل هتستحمل؟؟؟
طيب ما هو كان ممكن الريس يموت كانت البلد هتقع؟
لاااااااااا طبعا .. بس لو مات كانت الخطوات هتبقى معروفة طبقا للدستور
انما دلوقتى
احنا مش راضيين بالدستور
احنا رافضين القيادات اللى موجودة دلوقتى
احنا مش متفقين ع رئيس او حكومة لحد دلوقتى
احنا مش محددين نقطة النهاية .. و مش التنحى .. لان زى ما قلت فى ناس قايلة نقطة النهاية محاكمته
و غير كده احنا مش عاملين حساب انقسام المصالح بعد التنحى (توزيع التورتة زى ما وائل قال)
طيب و المظاهرات
المظاهرات اولا مافيش حد يتكلم بلسان الشباب و ده غلط-من رايى يعنى -
بجانب ان الناس عاوزة قرارات تتنفذ و خلاص
طيب ليه مانتفاوضش
هو تحدى يعنى؟
بجانب
ليه مايتعملش تصويت ع الانترنت و نشوف هل الشعب اللى اكتر من 80 مليون موافق ع ده ولا لا
بجانب عدم الثقة فى النظام
لانه كالعادة وعد .. و عهدنا به انه خلاف لوعوده
بس فى نقطة
اولا
النظام كان مقتنع و لفترة لا تتعدى ايام اننا بنضرب و نسكت
اننا بيضحك لعينا بسهولة
اننا مش هنقدر نتكلم
دلوقتى هو موقن ان ميدان التحرير موجود
ليه مانجربش
و الله و الله و الله مش فكرة انى مش عاوزة حرية كاملة
انا زيى زى اى مصرى
نفسى فى بلد حرة
اتكلم فى الجامعة من غير ماحد يقولى بلاش كلام فى السياسة
اقول رايى فى كل حاجة و اتسمع
تليفزيوننا يبقى ليه مصداقيته و اصدقه مرة فى حياتى
نفسى يبقى فى مشروع قومى الحكومة معرفانا بيه و الشعب كله بمختلف طوائفه يشتغل عليه
نفسى اى حد ياخد اى حاجة من البلد يبقى مستحقها
نفسى فى حاجات كتييييييير
بس ماينفعش يخلينى ابقى مندفعة او كله يحصل مرة واحدة
حقنا ؟ .. اه حقنا و نستحق اكتر من كده
بس انا لانه مش معانا فلما اخده صعب اخده كله
الحرية ليها ثمن غالى ..
اه الحرية ليها ثمن غاااااااالى جدا و لازم يتدفع .. بس اى موقف لازم تتحسب كويس ايجابياته و سلبياته
لو السلبيات غلبت يبقى ده مش ثمن دى تضحية
و الحرية ليها تمن (حتى لو تضحية بحاجات و اشخاص) بس ماينفعش تكون كلها تضحية
طيب ايه السلبيات
السلبيات كل المخاوف اللى انا قلتها فوق
احتمالية المؤامرة (و احنا مش حاسبين نتائجها اصلا)
الناس مش متفقة ع حاجة
و ... (الكلام اللى قلته فوق كله)
طيب و الشباب اللى راح نسيب دمه
لااااااااا طبعا
بس هل ده مبرر انى ازود فى الخساير ؟؟
هل لما اخويا يتقتل ده مبرر انى انتقم بدون حساب العواقب كويس؟؟
:::::::::::::
و أخيرا
اقسم بالله الموضوع ده مش هدفه نهائى انى اقنع حد بكلامى
كل هدفه انه يكون حاجة زى عصف ذهنى ع الاقل ليا
ع الاقل عشان ازود نسبة اقتناعى بالحاجة اللى بقولها
او اغير رايى للافضل
بعتذر جدا لو فى اى كلمة ضايقت اى حد فيكم(اكيد مش قاصداها)
::::::::::::
اللهم احفظ مصر و شعبها و شبابها
اللهم ارحم شهداء مصر
اللهم صبر أهلهم .. اللهم صبر أهلهم .. اللهم صبر أهلهم
اللهم ارنا الحق حقنا و ارزقنا اتباعه و ارنا الباطل باطلا و ارزقنا اجتنابه

الخميس، 3 فبراير، 2011

مصر .. ربى يحميكى يا بلدى


السلام عليكم و رحمة الله
حاسة انى مش عارفة اكتب أو جوايا حاجات كتير مش قادرة اعبر عنها
ولا حتى قادرة احكم ع موقف انه صح 100%
و اظن ان أغلب المصريين كده
انا مش هتكلم الريس يكمل ال6 شهور
او الريس لازم يرحل
انا بس عاوزة اقول حاجتين
اولا
ياريت بلاش دلوقتى الناس تمشى ورا كل كلمة
اللى يقول الرئيس نزل الناس عشان تضرب فى الشباب .. اقوله اتاكد حرام عليك بلاش كرهنا لشخص يدفعنا لظلمه
و اللى يقول الشباب هو السبب حتى لو سبب غير مباشر
اقوله حرام عليك الشباب دول عملولنا حاجة مانحلمش بيها
ياريت بلاش نجزم بحاجات ماعليهاش دليل قاطع
و خلينا ندى الناس حقوقها و احنا مقتنعين براينا برده ..
(ملحوظة : موقف الرئيس دلوقتى مريب .. انا بس بقول نتأكد من كل حاجة)
تانى حاجة
زى مانت ليك راى فى مستقبل بلدك فغيرك ليه راى ياريت تحترمه و بلاش توصف غيرك انه خاين لمجرد قال رأيه
لان كل واحد فينا ليه رؤيته الناقصة بصفتنا بشر و اظن كل واحد ليه مبرره
و أخيرا
ياااااااااااارب يااااااااااااااااارب لو تكميل المظاهرة خير لمصر فاكتبها لها و يسرها و لو تكميل المظاهرة شر لمصر فانهيها ياااااااارب ع خير فانت القادر على ذلك
ياااااااارب احنا مختلفين فى الآراء و كل واحد ليه رؤيته الناقصة و أنت ربنا ذو الكمال
اللهم دبر لنا .. اللهم لا تكلنا إلى من لا يرحمنا .. اللهم لا تكلنا إلى أنفسنا و أهوائها
يااااااااااارب يقيننا بيك انك هتحمى مصر
يااااااااااارب مالناش غيرك
اللهم اجعل مصر سلاح الإسلام و بوابة نصره
اللهم احمى مصر و شبابها و أمنها .. و كل المسلمين
اللهم ارحم شهداء مصر يااااارب
اللهم احمى مصر .. اللهم احمى مصر .. الهم احمى مصر
اللهم يا ربنا يسر لمصر كل خير
امين .. امين .. امين

الخميس، 20 يناير، 2011

تونس و مصر .. هناك فرق !!


السلام عليكم و رحمة الله
ياااااااااااارب حضراتكم تكونوا بخير .. و الحياة تكون سعيدة معاكم
و الناس اللى بتمتحن يااااااااارب يكون كله تمام .. ربنا يوفقنا يااااااااااارب
مبدأيا
متابعتى للموضوع مش قوية نظرا لظروف الامتحانات
موضوع ايه بقى
موضوع الساعة .. ألا و هو
تونس
على متابعتى البسيطة (جدا) للموضوع انهم ناس عارفين يعنى ايه حرية
و قررو ان خلاص بقى
كفاية ذل لحد كده
دى تونس
أما بلدى العزيز مصر و شعبها الحر الأبى فمازال مُصر ع التبعية
إما للحكومة اللى هما ( بيدعو عليهم ليل نهار)
أو
لمن يرضونه متبوع
ألا و هو أيضا شعب تونس
ففجأة و بدون سابق انذار تسابق الكل للانتحار
(ده ع اساس يعنى انهم هيحسو بيكو .. ياللا اهى الكثافة السكانية هتقل)
اللى الناس مش واخدة بالهم منه -ع اد متابعتى البسيطة برده-
ان اللى حصل فى تونس مش لتأثر الحكومة الرحيمة القلب باللى عمله الشاب
الشعب هو اللى عمل .. الشعب هو اللى قرر و غير من نفسه ثم حكومته
الشعب التونسى مانتحرش بعد اللى حصل كابداء للاعتراض
و سورى يعنى
اللى ينتحر ده شخص جبان
لما حضرتك قوى و هتنتحر بقى و هتضحى بنفسك
قول كلمة حق فى وجه ظالم و ( موتة بموتة بقى ) ع الاقل تكون عملت حاجة ربنا أمر بيها
انما ان حضرتك تروح تنهى حياتك عشان تكون الشخص اللى ضحى بنفسه عشان قضية وطنه العزيز عليه
ده يبقى .....
(ماقصدش الشاب التونسى ع فكرة .. انا بتكلم ع اللى بيحصل فى مصر)

مشكلتنا كشعب مصرى اننا حاسين بصفاتنا الملائكية زيادة عن اللزوم

فاحنا ناس ناضجة .. و الحكومة الملعونة تكره النضج

و احنا برده ناس بتخلص فى عملها .. و برده الحكومة الملعونة هى من تمنعنا من اتقان عملنا

و برده احنا اللى بيبقى نفسنا مانعطلش بعض فى المصالح الحكومية .. لكن الحكومة موقفة ضابط على كل موظف عشان يمنعه من خدمة المواطن

بلاش نخترع لنفسنا شماعات وهمية و نقول الحكومة هى الكارثة و هى اللى عاملة فينا ده كله

لو احنا ناس تستاهل رئيس احسن من اللى حاكمنا ماكنش ربنا خلاه رئيسنا

لان ربنا عااااااااااااااااادل

"فكما نحن ولى علينا"

ياريت كل واحد يهتم بدائرة تأثيره و نبطل شعارات .. لأن " إن الله لا يغير ما بقوم حتى يغيروا ما بأنفسهم " .. هنا هنتحسن

و كل واحد باختصاصه بقى

اللى ليه فى السياسة يتكلم و يعمل و اللى ليه فى الكتابة يكتب و يفهم الشعب

و اللى معاه فلوس يبنى و يطور باستطاعته

أما اللى اختصاصه كيمياء .. فهيدعيلكو ان ربنا يوفقنا كلنا ياااااااارب و نقدر نعمل حاجة للبلد دى

و طبعا ليه دوره

هنا هنغير حالنا باذن الله .. أو كحد أدنى

لو مش احنا الجيل اللى هيعمل التغيير

فنجهز نفسنا اننا احنا اللى نربى الجيل ده

و أخيرا

فااااااااااائق احترامى لشعب تونس .. و ربنا ينصركم و ينصرنا