الأربعاء، 24 نوفمبر، 2010

حالتك ايه؟؟






السلام عليكم و رحمة الله



من المعروف ان حالات المادة 3 صلبة و سائلة و غازية (البلازما حاليا تُصنف انها حالة رابعة .. بس ما علينا)



لو حضرتك حركت الهواء -غاز- بايدك .. حركو الهوا بجد -معلش خدونى ع اد عقلى-

لاحظتو ايه؟؟

حسيتو بهوا صح؟ .. الهوا اتحرك بحركة ايدكو حتى لو بسيطة .. تمام؟



طيب لو ضربتو ايدكو فى البحر .. هتحسو بحركة .. بس اقل و انتو هتحسو بمقاومة و لو بسيطة .. صح؟؟؟



طيب اضربو كرسى كده .. احتمال يتحرك .. و احتمال لأ .. هنا بقى حسب شدة الضربة

و حتى لو اتحرك هيتحرك زى ماهو .. مش هيتحرك و يسيب الباقى منه .. مش هيتغير بحركته

لأ

هيتحرك بكل مكون فيه

بكل قيمه و مبادئه



يعنى ايه؟؟؟

هو الفرق بين الغاز و السائل و الصلب ايه؟؟؟

العشوائية صح؟

يعنى ايه؟

يعنى العشوائية فى حركة الغاز اكتر منها فى حالة السائل اكتر منها فى حالة الصلب



و ده اللى سبب سهولة تاثره باى مؤثر حتى لو بسيط .. تمام؟

يعنى ايه برده ؟ او ايه علاقته بينا احنا؟



احنا كلنا بلا استثناء بنتعرض لمواقف صعبة أو أزمات فى حياتنا .. رد فعلنا تجاهها بيختلف

و تأثرنا بيها بيختلف

ده بيرجع لايه بقى .. لعشوائيتنا-بجد عن تجربة شخصية و تجربة معملية-
يعنى انا لما اكون حد محدد هدفه اوى و عارف عاوز اوصل لايه و عارف اوصله ازاى و بعمل خطوات فعلا
اى مشكلة هتواجهنى هشوف انا فين هعمل ايه هعوض اللى حصل ازاى .. و هكذااااااا
حتى لو وقفنا مش هنقف بس هتبقى وقفة مراجعة .. هتبقى كل صدمة فى حياتك بتفكرك بهدفك الاساسى
هدفنا يا جماعة و رغبتنا اننا نوصله
هدف نحرق نفسنا عشان نوصله
هدف نقول فيه "ياااارب إن تركتنى فإن الأمة ستُغلب"
هدف "و ما خلقت الجن و الإنس إلا ليعبدون"
هدف يكون ثغرك اللى بتدافع عنه فى سبيل نصرة أمتك
هدف .. و رغبة بجد فيه .. و يقين حقيقى فى تحقيقه -باذن الله-

الرغبة فى النجاح هى أن تعشق حلمك .. أن تحارب من أجله
أن تسهر من أجله .. أن تقاوم كل شئ من أجله
أن يكون الحلم دائما أمام عينيك .. أن يكون المهمة رقم 1 فى قائمتك
هنا فقط أنت ترغب .. و هنا فقط يمكنك الفوز

الأربعاء، 17 نوفمبر، 2010

ابتسم ..



السلام عليكم و رحمة الله

يارب تكونوا بخير .. و الحياة سعيدة معاكو

ايه رأيكم فى الرضا ؟؟

الرضا بالمشاكل او وضع معين مضايقك او شخص معين مزعلك او

قضاء ربنا ..

كتير اوى بنتحط فى مواقف مش عاجبانا وبيبقى جوانا حاجة بتتردد حتى لو ماقلنهاش باللسان

هو ليه حصل كده؟؟ يارب انا مش معترض بس نفسى اعرف؟!

نسمع جملة "لو اطلعتم على الغيب لاخترتم الواقع "

احنا مقتنعين اكيد بيها و بتريحنا كتير .. بس بعدها بشوية "يارب انا عارف ان ده الخير , بس مش قادر تعبان و زعلان و متضايق و حاسس ان كل حاجة و كل حد ضدى "

اوقات كتير بنتجرح من ناس عزيزة علينا اوى

بنعيش قسوة الجرح و صدمة انه من الناس دى .. و برده مش عارفين هو ليه بيحصل كده ؟ هى ليه الدنيا وحشة كده؟؟

هو ليه الناس بتقسى ع بعض او بتعامل بعض بقسوة اوى كده؟

هو الانسان هيخسر ايه لو عاش كانسان مش حاجة تانية تهدم كل حاجة حلوة حواليها؟؟

اوقات كتيييير اوى بنتعب من الدنيا .. بنبقى خلاص

اتخنقنا .. و مش عارفين هو احنا اللى صح و لا احنا غلط

نقول ع نفسنا احنا طيبين و نلاقى نفس الحد اللى جرحنا و عمل فينا كل حاجة وحشة يقول ع نفسه طيب و ملاك و احنا اللى مش كويسين

طيب لو احنا مش كويسين ليه بنتجرح مابنجرحش ؟!!

غريبة اوى الدنيا دى !!

:::::::::::::::::::::

لما بنتحط فى مشكلة بتضيق الدنيا اوى فى عيننا و –غالبا- بننسى حاجات كتييييييييييييييييير اوى اوى كويسة فى حياتنا و نعم كتييييير اوى ربنا انعم بيها علينا

عارفين..

من فترة كده اتحطيت فى موقف ضايقنى ..

و فى مرة كنت بفكر فى الموضوع و عاوزة اعرف هو ايه اللى حصل و ليه حصل بالاسلوب ده فحسيت انى متضايقة

عارفين عملت ايه؟؟

رحت صليت ركعتين شكر انى اتحطيت فى الموقف ده و دعيت ربنا قلتله يارب انا عارفة ان ده الخير ليا بس نورلى بصيرتى يارب عشان اتعلم من الموقف ده

و الله يا جماعة حسيت بعدها بقوة و راحة نفسية لا تتخيلوها

حسيت ان الموقف كله حصل عشان اصلى الركعتين دول

يااااااااااااااااااااه ..

الله ع نعمة الاسلام و نعمة سجودنا للعزيز الرحمن

لما تحس انك مخنوق اوى من مشكلة .. و تسجد لمدبر الكون بأكمله و تقوله يااااارب انا اضعف من المشكلة دى و انت القوى العزيز .. اعنى ياااااااااارب

::::::::::::::::::

لما تتحط فى مشكلة ..

انا مش هقولك ماتحبسش نفسك فيها او انت اللى بايدك تحدد مدى تاثيرها عليك

بس افتكر كويس اوى"إن الله لا يكلف نفسا إلا وسعها" لو انت مش ادها و الله ربنا ما هيحط فيها

بس كونك فيها فأنت ادها و قادر انك تخرج منها و اقوى من الاول

::::::::::::::::::::

لما تتحط فى مشكلة .. شوف اللى حواليك

بجد .. هتحمد ربنا ع اللى انت فيه

"الأعمى يتمنى أن يشاهد العالم ...... والأصم يتمنى سماع الأصوات .. والمقعد يتمنى المشى خطوات .. والأبكم يتمنى ان يقول كلمات ..........و أنت تشاهد وتسمع وتتكلم.... فقل الحمد لله على كل شيء...الحمد لله"

,,,,,,,,,,,,,

شوف اخواننا فى فلسطين .. شعب كامل غير آمن .. طفل بيتقتل والده ادام عينه .. و اسرة فى بيتها مش عارفة تحس بأمان لانها معرضة ان البيت يتفجر فى اى وقت .. بنت سنها زينا -أو اصغر مننا- كل همها تنصر دينها ومش عارفة لا علم عارفة تتعلم و جواها صوتين ضد بعض

واحد انها تعمل عملية استشهادية و تبقى كده عملت حاجة لوطنها

و صوت تانى بيقول لا انتى ماتموتيش هما اللى احتلونا هما اللى يموتوا .. انصرى بلدك بس و انتى عايشة ..

هتعمل ايه؟؟

,,,,,,,,,,

شوفو برده زمايلنا اللى فى سننا ايه اللى بيحصلهم

(و انا فى التيرم الاول فى علوم .. امتحنا ميد تيرم و ماعجبتنيش الدرجة ,, اتضايقت اوى و كنت حاساها مشكلة بالنسبة لى .. بعدها بيومين بالضبط واحدة زميلتى ربنا توفاها .. حياتها انتهت .. ياترى انتهت ع ايه "الله اعلم" .. ياترى انا لو كنت مكانها كانت حالتى هتبقى ايه –ربنا يحسن خواتيمنا يارب- .. بس ساعتها عرفت اد ايه ان الدنيا ماتستاهلش)

,,,,,,,,,,,

شوفو المرضى

شوفو ناس كتير اوى محرومة من نعم كتييييير .. و النعم دى معاك انت

و برده متضايق

عارفين .. تخيل لو انك مش مسلم

يااااااااااه تخيل كده تسجد لغير الله

ربنا اختارك انت للاسلام زى ما اختار الاسلام ليك

اختار لك انك لما تكون متضايق تسجدله و تقوله

يااااااااااااااااااااااااااااااااااااااااارب ماليش غيرك يارب

دى مش نعمة تضيع كل المشاكل ؟!!

,,,,,,,,,

عارفين لما تكونو فى مشكلة استعيدو شريط حياتكو بسرعة

كام مشكلة ربنا حلها

و كام مرض ربنا شفاك منه

و كام هم ربنا فرجه عنك

و كام حاجة مش كويسة ربنا نجاك منها

و كام مرة اعتبرت حياتك وقفت و اكتشفت انها كانت البداية المشرقة ..

و كام انسان مش كويس ربنا حماك منه

و كام و كام و كام ..

هتعدى .. و الله هتعدى زى ما اللى اسوأ منها عدى .. بس انت ابتسم و قل الحمد لله

"قـل لمـن يـحـمـل هـمـًا أن هـمـه لـن يـدوم .. فـمـثـلـما تـفـنـى الـسـعـاده هـكـذا تـفـنـى الـهـمـوم"

ابتسم .. لأن ابتسامتك سبب فى ابتسامة ناس كتير اوى بتحبك ممكن انت مش حاسس بيهم

كل حد بتقابله عنده مشاكل كتييير .. خففها انت بابتسامتك

ابتسم .. و اقهر احزانك

ابتسم لانك عبدالله

"عجبا لأمر المؤمن إن أمره كله خير ، وليس ذاك لأحد إلا للمؤمن ؛ إن أصابته سرّاء شكر ؛ فكان خيراً له ، وإن أصابته ضرّاء صبر ؛ فكان خيراً له ."

,,,,,,,,,,,,,

دع الهموم والاحزان تبكى من جبروت ابتسامتك وكبرياء املك



الأحد، 14 نوفمبر، 2010

عيد سعيد ..


السلام عليكم و رحمة الله

الله اكبر الله اكبر الله اكبر لا اله الا الله
الله اكبر الله اكبر ولله الحمد
الله اكبر كبيرا والحمد لله كثيرا وسبحان الله بكرة واصيلا ولا اله الا الله وحده
صدق وعده ونصر عبده وعز جنده وهزم الاحزاب وحده لا اله الا الله
ولا نعبد الا اياه مخلصين له الدين ولو كره الكافرون
اللهم صلي على سيدنا محمد
وعلى آل سيدنا محمد
وعلى اصحاب سيدنا محمد
وعلى ازواج سيدنا محمد
وعلى انصار سيدنا محمد
وعلى ابناء سيدنا محمد
وعلى ذرية سيدنا محمد وسلم تسليما كثيرا

::::::::::::::::::::::::

كل سنة و حضراتكم طيبين و فى سعادة و نجاح دايما يارب


ربنا يجعل ايامنا كلنا فرح و خييييييير و امل

و يجعلنا أمل لكل حد حوالينا و لأمتنا و بلدنا يااااااااااارب

السبت، 13 نوفمبر، 2010

الأرض يا أحبابي مش حبة تراب




الأرض يا أحبابي مش حبة تراب

ولا نبع مية توصله يطلع سراب

ولا جسم جدي إللي إندفن من ميت سنة

ولا ذكرى مرة ومحزنه ولا حلم طاير مننا

فوق السحاب

الأرض إحساس بالأمان

إحساس بأنك فْ الحياة إنسان

ولك في الكون مكان

يمكن يكون موضع قدم

يمكن يكون بيت إتهدم

يمكن يكون فــدان

بس المهم إللي يدور يلقى ليك عنوان

وعشان كده لو حتى هندوق العذاب الوان

الأرض تستاهل كتير

تستاهل المر إللي دقناه كلنا

تستاهل الكرابيج تقطـع دهـرنا

ياللي ناويت الغنا غني بصوت عالي

صوتك فْ قلبي أنا زي الضنا غالي

غني عشان أرضنا والمر يحــلا لي

دعيت زمان ربنا وفيوم كتبهـالي

وبقالي موضع أدم وبقالي بيت ومكان

وكمان بقالي وطن ف زمان مالوش أوطان

وبقالي ورقة وقلم وبقالي صوت وأدان

ياللي ناويت السهر والسهرة صباحي

طول مالقلم صاحي بيلون الأحـلام

ويشدني لقدام ويداوي ف جراحـي

وأزرع تقاوي الأمل يطرح لي أفراحي

أنا إللي لجل الوطن هزمت أشـباحي

رفرفت بجناحي من غير ما طير وأحوم

علشان ما سبش الأرض

وحلفت أصون العرض

وحلفت أرويها بالحب وبدمي

يمكن أخليها يوم ما أندفن فيها

عليّ ألاقيهـا أحـن مـن أمي

لـــ أسامة عبد الصبور
شاعر مصرى