السلام عليكم و رحمة الله
من المعروف ان حالات المادة 3 صلبة و سائلة و غازية (البلازما حاليا تُصنف انها حالة رابعة .. بس ما علينا)
لو حضرتك حركت الهواء -غاز- بايدك .. حركو الهوا بجد -معلش خدونى ع اد عقلى-
لاحظتو ايه؟؟
حسيتو بهوا صح؟ .. الهوا اتحرك بحركة ايدكو حتى لو بسيطة .. تمام؟
طيب لو ضربتو ايدكو فى البحر .. هتحسو بحركة .. بس اقل و انتو هتحسو بمقاومة و لو بسيطة .. صح؟؟؟
طيب اضربو كرسى كده .. احتمال يتحرك .. و احتمال لأ .. هنا بقى حسب شدة الضربة
و حتى لو اتحرك هيتحرك زى ماهو .. مش هيتحرك و يسيب الباقى منه .. مش هيتغير بحركته
لأ
هيتحرك بكل مكون فيه
بكل قيمه و مبادئه
يعنى ايه؟؟؟
هو الفرق بين الغاز و السائل و الصلب ايه؟؟؟
العشوائية صح؟
يعنى ايه؟
يعنى العشوائية فى حركة الغاز اكتر منها فى حالة السائل اكتر منها فى حالة الصلب
و ده اللى سبب سهولة تاثره باى مؤثر حتى لو بسيط .. تمام؟
يعنى ايه برده ؟ او ايه علاقته بينا احنا؟
احنا كلنا بلا استثناء بنتعرض لمواقف صعبة أو أزمات فى حياتنا .. رد فعلنا تجاهها بيختلف
و تأثرنا بيها بيختلف
ده بيرجع لايه بقى .. لعشوائيتنا-بجد عن تجربة شخصية و تجربة معملية-
يعنى انا لما اكون حد محدد هدفه اوى و عارف عاوز اوصل لايه و عارف اوصله ازاى و بعمل خطوات فعلا
اى مشكلة هتواجهنى هشوف انا فين هعمل ايه هعوض اللى حصل ازاى .. و هكذااااااا
حتى لو وقفنا مش هنقف بس هتبقى وقفة مراجعة .. هتبقى كل صدمة فى حياتك بتفكرك بهدفك الاساسى
هدفنا يا جماعة و رغبتنا اننا نوصله
هدف نحرق نفسنا عشان نوصله
هدف نقول فيه "ياااارب إن تركتنى فإن الأمة ستُغلب"
هدف "و ما خلقت الجن و الإنس إلا ليعبدون"
هدف يكون ثغرك اللى بتدافع عنه فى سبيل نصرة أمتك
هدف .. و رغبة بجد فيه .. و يقين حقيقى فى تحقيقه -باذن الله-
الرغبة فى النجاح هى أن تعشق حلمك .. أن تحارب من أجله
أن تسهر من أجله .. أن تقاوم كل شئ من أجله
أن يكون الحلم دائما أمام عينيك .. أن يكون المهمة رقم 1 فى قائمتك
هنا فقط أنت ترغب .. و هنا فقط يمكنك الفوز
12 ضع بصمتك ..:
امممممم
مش بس أبدعتي في الكتابة والتصوير لكن أهديتنيي فكرة ربنا يسهل واكتب عنها قريب
عشوائية النظام سبب رئيسي فيها ضعف قوى الترابط والتماسك بين أفراده وزيادة الفوارق البينية بينهم
وبالتالي جزيئات الغاز كل واحد فيهم في وادي وده اللي بيخلى الغاز هش ومبيقدرش يدافع عن نفسه أدام أي هجوم على جزيئاته بهدف تحريكها أو حتى الاطاحة بيها
سموالامير
ربنا يكرمك يا سموالامير
و ربنا يعينك باذن الله و تكتب الفكرة باسلوبك الرااائع
:::::::
فى كمان جزئية ماعرفش هى ممكن تساعدك ولا لا
فكرة العشوائيةENTROPY فى الديناميكا الحرارية ان دايما بيبقى فى جزء من العشوائية و ده بيمنع تحويل الطاقة من شكل للتانى بنسبة 100% زى مثلا ان طاقة الشباب ماتتحولش لانتاج فعلى للبلد
فى بقى القانون التانى للديناميكا الحراية هيوضح قصدى
gain in information is loss in entropy
مش عارفة هل ممكن ندخل هنا قانون نيوتن ان الغاز جزيئاته بتصدم بعض و بالتالى الطاقة بتتلاشى (ع اساس القوة متساوية و فى اتجاهين متضادين).. مش عارفة علميا ده صح ولا ايه
ربنا يعينك يا سموالامير .. فى انتظار الموضوع باذن الله
بجد العلومانجي علومانجي...!!
مش قادرة تنسي التفكير العلمي شوية :)
أنا باضحك طبعا لأني بافكر بنفس الأسلوب، وعندي قناعة كبيرة إن قوانين الفيزياء بتنطبق بشكل غريب على البشر في حالات كتييير!!
عجبني تشبيهك.. وعجبتني فكرتك يا أحمد.. وباحذرك.. لو ماكتبتهاش خلال 12456 يوم هكتبها أنا.. علشان تبطل تكسل مع مدونتك :)
تحياتي أختي شموخ، ودمتِ سالمة.
جميل جدا الموضوع ده
وللأسف ناس كتير بتقع ف الغلط ده
اى حد حصلله حاجة معينة مشكلة مثلا
يقوم يهرب من الموضوع كله
واحدة اتطلقت لا قدر الله واتعرضت لظلم من جوزها
تقوم تكره الجواز والرجالة والعيشة كلها
واحد شال مادة لا قدر الله فيحول من الكلية
وهكذا بقى
وده ناتج من عشوائية التفكير
بمعنى أوضح مفيش مبدئ وأسس للتفكير
مش عارفة هل ممكن ندخل هنا قانون نيوتن ان الغاز جزيئاته بتصدم بعض و بالتالى الطاقة بتتلاشى (ع اساس القوة متساوية و فى اتجاهين متضادين).. مش عارفة علميا ده صح ولا ايه
معتقدش لأن القانون العام للغازات قايم على كذا فرض منهم إن التصادمات بين جزيئات الغاز تصادمات مرنة مبيحصلش فيها فقد للطاقة ولا كمية الحركة
حتى بعد التعديلات اللى اتعملت على القانون العام في ظروف درجات الحرارة المنخفضة أو الضغط العالي متغيرش الفرض أوي يعني ممكن نقول إن فيه فقد في الطاقة لكن مش بتلاشي بعضها
بالنسبة للفكرة اللي جاتلي فهي مش بخصوص الكلام عن الغاز أد ما هي على الأسلوب العلمي المتأدب اللي كتبتي بيه الموضوع زي إني استخدم نظرية علمية لعمل إسقاط على فكرة أو رأي معين
عموما أنا باجهزه وان شاء الله اكتبه قريب
عجبتني أوي جملة
Gain in information is loss in entropy :)
جزاك الله خير فعلا موضوع جميــــل و مدونه اجمل
فعلا انا عجبنى طريقه كتابتك بارك الله فيك
ادعوكم لمتابعه مدونتى المتواضعه
http://elshabelsa7.blogspot.com/
أ\ماجد
ع فكرة انا بحس ان قوانين الكيميا بتطبق بنسبة بكيرة جدااا ع حياتنا كبشر
حتى الروابط الكيميائية انا كنت فكرت فيها قبل كده بجد منطبقة علينا جدااا
شرفنى مرور حضرتك ..
الظل
صح جداااا
لما يحصل مشكلة لان مافيش هدف نهائى عاوزين نوصله بنبيع القضية كلها
اسعدنى مرورك يا باش مهندس
سموالامير
صح .. ماخدتش بالى !
ربنا يعينك يا سموالامير .. فى انتظار الموضوع باذن الله
الشاب الصح
جزاكم الله كل خير
ربنا يجعلنا كلنا شباب صح و فى الطريق الصح
بسم الله وبعد
بوركت أختنا في الله على طرحك الطيب وطريقتك الرائعة في سرد الكلمات مما يمنح القارئ عنصر التشويق ليصل إلى نهاية الموضوع وقد رسخت المعلومات في عقله
جعل الله أعمالك في ميزان حسناتك إن شاء الله
---
إخوانك في الله
المنشد أبو مجاهد الرنتيسي
أحلام الرنتيسي
المنشد أبومجاهد الرنتيسى
جزاكم الله كل خير
بجد انا سعيدة جداااا بمرور حضرتك
إرسال تعليق