الأحد، 17 أبريل، 2011

لحظة تسامح


السلام عليكم و رحمة الله


يارب تكونو كلكو كويسين و بخير و نجاااااااااااح و سعاااااااااااااااادة ,, يااارب


كنت كل فترة اقف مع نفسى وقفة و اقرر انى اسامح الكل ,, بس صراحة ॥ كان فى ناس مابحبش افتكر هما عملوا فيا ايه عشان لو افتكرت ماظنش انى هقدر اسامح!!

و من فترة قررت قرار ألا و هو

انى سامحت كل حد عمل فيا اى حاجة مسامحة بجد فى الدنيا و فى الآخرة و قررت كمان انى باذن الله مش هزعل من اى حد تانى خالص

:::::::::

من اول مرة سمعت فيها جملة "وراء كل سلوك نية إيجابية " و انا بحاول أدقق شوية فى دوافع الناس

لاقيت ان كل حد بيتصرف من رؤيته بدافع ما ,,

انا شايفة انى من حقى ادافع عن نفسى ضد فلان لانه هيتكلم عليا كلام مش كويس فهسبقه !

غلط اه ॥ بس فى دافع ,, ليه ما نحاولش نصحح الدافع فيتصحح السلوك تلقائيا ؟

:::::::::

كنت اوقات اقول هما ليه الناس كده ؟ ليه الناس مش بيراعو مشاعر اللى ادامهم و ... الخ

و فوجئت ان نفس الناس بيقولو نفس الكلام!!

الغلط فين ؟؟؟؟

هل لأن كل واحد فينا شايف نفسه ملاك؟؟

ولاّ

لأن كل واحد فينا شايف اللى ادامه شيطان ؟؟؟؟

:::::::::::::::::::

فعلا الناس طيبين اوى بس برؤيتهم ,, و كلنا -فى الغالب- فعلا لو لاقينا اللى بيحس بينا -برؤيتنا احنا مش رؤيته هو- هنبقى ملايكة -ع الاقل فى التصرف البشرى بيننا -

حاولو تتعاملو من المنظور ده و بلاش نعتقد اننا ملايكة و معصومين من الغلط

حضرتك مش ملاك زى ما الآخر مش ملاك ,,

زى ما غيرك جرحك انت جرحت كتير ॥ حتى لو بدون قصد ॥ ليه نجزم ان الآخر متعمد يجرحنا ؟

الناس اطيب من كده بكتييييييير ,, ممكن انت تكون محسسهم بعدم الامان تجاهك فتصرفاتهم معاك مش كويسة لانهم اصلا خايفين منك!

ممكن-و ده غالبا- حصل سوء فهم و كرامتك منعتك تبرر ॥ و الآخر برده كرامته منعته يبرر ॥ ليه تلومه ع فعل انت سبقته بيه؟؟

::::::::::::

فكرت مرة فى لحظة ما بعد وفاتى ,, و تخيلت الناس هتقول عليا ايه ,, أو انا احب انهم يقولو عليا ايه ؟؟

و قررت من ساعتها انى باذن الله اكون سبب فى بسمة كل حد اتعامل معاه او حتى يشوفنى-بقدر استطاعتى- ,, و كنت فى البداية معتقدة ان الموضوع ممكن يقابلنى فيه صعوبات ,, بس الموضوع طلع سهل جدااا -الحمد لله-و ابتسامة الناس و حبهم سهل اوى اوى اوى

::::::::::::

يا جماعة و الله الدنيا فعلا مش مستاهلة اننا نزعل من بعض او نتفنن فى زعل بعض و لا اننا نقول "و الله مش هسامحه"

كل واحد فينا عنده هموم كتير اوى ليه بنزود همومنا بحاجة مش مستاهلة اصلا؟!!

حاولو تفتكرو للناس حاجة كويسة فيهم سواء فعل او تصرف ,, و اكيد هتلاقو


:::::::::::::::::


قال ابن القيم-رحمه الله-

يا ابن آدم إن بينك و بين الله خطايا و ذنوب لا يعلمها إلا هو

و إنك تحب أن يغفرها الله لك ,, فأغفر أنت لعباده

و إذا أحببت أن يعفوها عنك فاعفو أنت عن عباده

تعفو هنا يعفو هناك ,, تنتقم هنا ينتقم هناك ,, تطالب بالحق هنا يطالبك بالحق هناك


:::::::::::::::


اللهم إنى تصدقت بعرضى على الناس و عفوت عمن ظلمنى فمن شتمنى أو ظلمنى فهو فى حل ,, اللهم إنى سامحت كل من اغتابنى أو ذكرنى بسوء فى غيبتى و اسألك فى ذلك الأجر و المغفرة و بلوغ مراتب المحسنين

اللهم أيما عبد أو أمة من أمة محمد صلى الله عليه و سلم اغتابنى أو ظلمنى أو بهتنى أو قذفنى أو قال فى ما ليس فى ,, فإنى قد عفوت عنه و تركتها له

8 ضع بصمتك ..:

rack-yourminds يقول...

هذا البوست اثار في ذهني خواطر عن أحداث كثبره مرت في حياتي, وبالتأكيد لا يستطيع الأنسان أن يحكم علي نفسه بحياديه تامه ,لكن يا سيدتي ثمة مواقف قد تجعل الشخص غير متسامحا عندما يصدم في اناس قساة القلب واختلافات جذريه في الطباع هذا فضلا عن أن الاصول المتعارف عليها اصبحت تخضع لوجهات النظر !! وفي حاله اخري :قد يظن البعض ان التسامح منطلقه ضعف في تركيبة هذا الشخص ومن ثم يتمادي في سلوكه المستفز ,فما العمل في تلك الحاله؟ فهو يري أنه من واجبه أن يذود عن نفسه من شبهات
"لا يحب الله الجهر بالسوء من القول الا من ظلم"وقوله تعالي "ولمن انتصر بعد ظلمه فاولئك ما عليهم من سبيل"

لكن يا سيدتي اكيد التسامح هو افضل شئ فيه طاعة لربنا وفيه سلام للنفس

"ولا تستوي الحسنة ولا السيئة، ادفع بالتي هي أحسن فإذا الذي بينك وبينه عداوة كأنه ولي حميم، وما يلـقاها إلا الذين صبروا وما يلقاها ألا ذو حظ عظيم"

"والكاظمين الغيظ والعافين عن الناس والله يحب المحسنين"
______
دايما مواضعيك مؤثره ,,بارك الله فيكي

ِ

ماجد القاضي يقول...

السلام عليكم

ما تحدثتي عنه معنى قيم جدا من أخلاقيات الإسلام وهو قيمة الصفح..
وجميل جدا ما اشرتِ إليه من وسيلة لمحاولة التعدو عليه ألا وهو تذكر أخطائي لدى الآخرين حتى يمكنني الصفح عن أخطائهم..
أنا شخصيا أحاول ذلك كثيرا.. وكما قلتُ في مدونة سابقة لي: منهجي دائما عند محاسبة الذين أساؤوا إليّ أن أجعل مساحة للضعف البشري في حساباتي...!
لكن الأمر يحتاج منا إلى مجاهدة، فنقدر مرة ونزل أخرى.. المهم أن نحاول دائما..
أشكرك على الذكرة الطيبة..
بارك الله فيكِ ويما خطت يداكِ..
تحياتي أختي الكريمة.

شموخ مسلمة يقول...

rack-yourminds :

باالنسبة لنقطة الاختلاف فى الطباع او اسلوب الحيا القاسى او ما شابه فلو مش هستحملهم زى ما هما انا ع نفسى بفضل ابعد بس و احنا بنحب بعض و ده اظنه شئ طبيعى لان فى ناس اختلافهم عننا مش هنقدر نتكيف معاه و ف نفس الوقت الاحتكاك المستمر معاهم هيولد شحنات سلبية جوانا تجاههم

اما للظن ان التسامح قد يكون ضعف
ماهو لو فى حق مش كل مرة بسيبه و مش كل حق يتساب و مادام اخدت حقى مرة فهثبت للى ادامى انى مش ضعيفة
و اولا و اخيرا الاخر حر فى رايه هو شايفه ضعف هو حر المهم حضرتك شايفه ايه
لو حضرتك شايفه قوة كل ما تسامح هتحس بقوة زيادة ,,

جزاك الله خيرا

شموخ مسلمة يقول...

أ\ماجد:

منهجي دائما عند محاسبة الذين أساؤوا إليّ أن أجعل مساحة للضعف البشري في حساباتي...!

جميل اوى المنهج ده فعلا بيريحنا و بيريح غيرنا و بيدى مساحة للتسامح كبيرةا وووى

جزاك الله خيرا يا استاذ ماجد ع الاضافة

مها البنا يقول...

شموخ

رساله رائعه وتحمل من المعانى أرقاها على الإطلاق .. ألا وهو التسامح.

أنا معاكى قلبا وقالبا إن بعض التصرفات السيئه من بعضهم بتكون بدافع سوء فهم او رد فعل لخوف بداخلهم وكما حثنا ديناا الحنيف .. التمس لأخيك سبعون عذرا .. لكن هناك من لم يدفعه للخطأ سوى الجبروت والرغبه فى إذلال الأخرين وسلب حقوقهم

رسالتك أثارت فى نفسى الكثير والكثير .. وهى ليست بالذكريات الجميله فى شئ.

عموما أنا أشهد الله معك أنى سامحت كل عبد أو أمه ظلمتنى أو قست عليا بحسن نيه او كرد فعل لسوء فهم صدر عنى وأسأل الله أن يبلغنى مراتب المحسنين ويجمعنى بالسيده عائشه وبأحبتى وأخوتى فى الله .. أمين.

لكنى أسأل الله أن يمهل لمن شهد زورا وساهم فى ظلمى وسلبى حقوقى حتى إذا ما أطمئن أخذه أخذ عزيز مقتدر.

أسفه .. لست بتلك الدرجه من الرقى حتى أسامح بعضهم.



على جنب ...

وحشتنى بوستاتك جداااا

دمتى فى حفظ الله

rack-yourminds يقول...

غايبه يعني,اتمني تكوني بخير

شموخ مسلمة يقول...

مها البنا

بصى انا عارفة ان اوقات بيبقى صعب اوى التسامح بس مابقتش بركز ,, يعنى بحاول اتناسى شوية الموقف نفسه
عارفة يا مها اقوى لحظة تسامح ممكن نوصلها لما نفتكر الموت او حقيقة الدنيا بجد هنا بسامح اى حد لو عمل ايه
معاكى ان اوقات كتير بيبقى صعب اووى
بس (اغفرى هنا يُغفر لك هناك)

ربنا يسعدك يااااارب

اسعدنى مرورك جدا جدا جداااا

شموخ مسلمة يقول...

rack-yourminds

بعتذر ,, ظروف الدراسة كانت مهلكة التيرم ده