الثلاثاء، 8 فبراير 2011

ممكن نتناقش؟؟


السلام عليكم و رحمة الله
مبدأيا يا جماعة
كلنا متفقين اننا كلنا بنحب مصر
و كلنا بلا استثناء عاوزين مصلحتها بس من وجهة نظرنا و ده سبب الاختلاف فى الرأى(مش فتنة)
أولا يا جماعة الكلام غالبا مش مرتب .. فبعتذر مقدما
ثانيا: اتمنى كلامى يتفهم صح .. و اتمنى ان الرد يكون فكر بفكر .. و اتمنى اتمنى اننا قبل ما نتناقش نحاول نكون حياديين عشان نقبل نفكر فى الفكرة نفسها
ثالثا: الموضوع احتمال يطول .. انا فعلا مش عارفة هكتب ايه لحد اللحظة اللى بكتب فيها الجملة دى ..
و قد يرى البعض ان كلامى مستفز (لاختلاف الرأى) بس فعلا لا اقصد انى استفز اى حد !
و أخيرا : الحاجات اللى هتكلم فيها (مرتبة تصاعديا حسب الأهمية)
1- فكرة المؤامرة !
2-صفحة كلنا خالد سعيد!!
3-الريس يتنحى دلوقتى و لا يكمل فترته؟؟
::::::::::::::::::::
المؤامرة !!
مبدأيا انا اقتناعى بنظرية المؤامرة عموما قد لا تتعدى 25%
اما بالنسبة لفكرة المؤامرة فى الموقف الحالى تقريبا مش هتجيب 5 او 10%
و الله العظيم ده مش تشكيك فى وطنية اى شاب نزل المظاهرة
ولا تشكيك فى عقولهم او نضجهم
ولا بقول مسيسين
بس انا هذكرلكم مثال ذكرته قبل كده هيوضح فكرتى
(لو ليا واحدة صاحبتى قالتلى تعالى نروح نتبرع بالدم فانا رحت معاها بنية انى مساعدة الناس و عمل يقربنى لربنا و انى اكون ايجابية فى مجتمعى و لما انا خرجت كانت هيا متفقة مع ناس سرقو بيتى او موتو اخواتى او ...الخ
انا هنا حد كويس جداااااا
و طبعا استحالة ييجى فى دماغى ان حد يفكر التفكير الشيطانى ده
الخلاصة يعنى .. وارد ان يبقى فى مؤامرة حتى لو مش فى بداية المظاهرات ففى الحال حاليا أو مستقبليا)
ممكن حد يعتبر المثال ده فيلم عربى قديم !
بس ليه ننسف نظرية المؤامرة كلها مع اننا بنثبت المؤامرة لكل النظام السابق و الحالى متمثل فى رئيس الوزراء أحمد شفيق (اللى الكل بيشهد بنزاهته) و نائب الرئيس عمر سليمان (و اللى انا اعرفه انه كان من اكتر الناس اللى مرشحين للرئاسة من قبل الشعب قبل ما ده يحصل) .. مع ان الصهاينة اولى بالمؤامرة فى جميع الأحوال !
طيب لو فرضنا ان فى نظرية مؤامرة بنسبة 0.01 % ده المفروض يخلينا نحسبها كويس لان الموضوع مش بس بقى بيننا و بين النظام !
ييجى مع نظرية المؤامرة معركة (الجمل) اللى حصلت تانى يوم خطاب الريس
الكل قال ان الريس كان خطابه عاطفى عشان يخاطب بيه الشعب و يأثر ع عاطفته
و بالفعل استجابت نسبة مش قليلة للعاطفة دى او للخطاب نفسه
هل هو غبى لدرجة انه يستفزهم تانى و يستفز كل الناس اللى سابت التحرير ؟
هل هو بالغباء اللى يخليه يعمل حاجة زى كده ادام العالم كله ؟؟
هتقولولى امال ايه اللى كان بيعمله فينا قبل كده
هنا مختلف لسبب بسيط .. الريس كان كلامه انه هياسب اللى عمل و ... الخ من الوعود اللى تثبت -او تحاول تثبت- حسن نيته
ييجى فى اقل من 24 ساعة ينفيها كلها !!
مش قادرة اقتنع بدى
اما بالنسبة للدولة الصهيونية و موقفها
موقفها واضح ادام الكل عاوزين حسنى مبارك و طالبت العالم بالوقوف بجانبه
و ده طبعا اكد للكل انه عميل صهيونى
بس السؤال
هل الصهاينة اللى الكل عارف كم عمليات الاغتيال اللى حصلت لمجرد نشر البروتوكولات
او معرفة اى عميل ليها
هتطلع كده بمنتهى السهولة ادام العالم و هى شايفة الشعب مش طايقه ولا طايقها طبعا
و تقول لا
سيبوه اصله عميلنا !!
و الله حاولت اقتنع و اقنع نفسى بشتى الطرق مش قادرة اقتنع
ازااااااااى؟؟
طيب تقولى ايه فى موضوع تصدير الغاز؟؟
انا عارفة انها اسود حاجة فى تاريخه و دى كفيلة انه يرحل بقى و يسيبنا و يسيب البلد تعمل لنفسها تاريخ ابيض كله
بس موقف اسرائيل ده بالنسبة لى بيأكد ان فى حاجة مش واضحة
يا جماعة انا لما بتكلم ع المؤامرة و الله مش قصدى اشكك فى اى شاب من اللى فى التحرير .. بس اسمحولى افرض ان فى احتمال للمؤامرة .. فى حالة اننا كملنا و مش عاملين حساب لده ... اظن النهاية هتكون مش زى ماحنا حابين
:::::::::::::::
صفحة كلنا خالد سعيد
اولا
انا احترمت وائل غنيم لما سمعت كلامه
و احترمت احساسه
و احترمت انه حد حاسس بذنب مش ذنبه
و احترمت انه مدح فى ضباط الشرطة مع انه لو مش كويس كان بهدلهم
و احترمت جدا انه قال ان زوجته امريكية مسلمة
تمام؟
كلامى بقى اللى جاى مش سوء ظن
و ماحدش يقولى استغفرى
لانى مش بعمل فتنة انا بقول شكوك
احنا دلوقتى مش بنتكلم ع شخص مستقل فى حد ذاته و عمالة اقول فى شكوك كذا و كذا و كذا
انا بتكلم ع شخص سبب فى حاجات حلوة كتيييييييييييييييييييير حصلت لبلدى
و الموقف من اوله لدلوقتى سياسى و محتاج يتحلل
ماينفعش بقى ما نحللهوش و نقول عشان مانسيئش الظن بحد
فياريت اللى يرد عليا هنا بالذات يرد عليا كلام يقنعنى و اتمنى و الله انى اقتنع !
دلوقتى وائل اُعتقل 12 يوم
البيدج كان مين مشغلها ؟
قالو صاحبه اردنى
(نحديث: وائل غنيم ذكر فى البيدج من شوية ان اللى كان بيكتب مجموعة شباب اخدو منه الباس وورد يوم 25 و طبعا شباب وطنى يحب مصر و هنا يتجدد سؤال النت كان مفصول دخلو ازاى؟ و لو فعلا فى مناطق كان بقدر ربنا فيها نت ميدان التحرير اللى هما اصلا فاصلين النت من مصر بسببه هيبقى فيه نت ازاى؟؟؟؟)
طيب
اولا ليه ماقالش؟؟ (قالو برده ان عشان الناس ماتقلقش او ماتتراجعش ؟؟ و ده كلام غير منطقى تماما لان الصفحة كل اخبارها مين اتقتل و مين اتعذب و الجمال و الخيول و ... الخ بجانب ان المظاهرات خلاص باينة جدا انها مش هتتراجع لشخص بالعكس ده كان هيبقى مبرر انهم يطالبو بخروجه )
ثانيا
هل صاحبه الاردنى برده اوقات قطع النت من مصر هيقول انا داخل ديال اب؟؟؟
و هل صاحبه الاردنى برده هيقول انا دلوقتى فى التحرير و هروح اسلم ع امى و ارجع؟؟
و هل صاحبه الاردنى برده هيقول انا دلوقتى نازل التحرير و هكمل فيه النهاردة ؟؟؟؟؟؟؟
ازاااااااااااااااااااااااااااى؟؟؟
انا دماغى هتنفجر من انبارح بسبب الافكار دى
احنا قلنا الحكومة كارثتها ان مافيش وضوح و شفافية
نفس الحاجة انا شايفاها دلوقتى فى بيدج خالد سعيد
وائل بكى انبارح و ابكى الكل .. ماحدش قال عاطفة!
الكل بيقول وائل قال همشى و مشى و الريس لا .. و بالتالى الريس يخسر
لكن ايه وجه المقارنة ؟؟
وائل مشى من برنامج .. مافيش نتائج سلبية نهائى هتترتب على انه يسيب البرنامج
الريس هيمشى من بلد (لو فرضنا ان فى احتمال 0.001 % انه خايف عليها من احتلال او غيره) فى نتائج سلبية هتترتب و لو احتمال!
ثانيا
شبكة رصد و معروف طبعا انها اتعملت عشان مظاهرات مصر
هل من المنطقى يا جماعة ان تتعمل بيدج بمراسلين و صور فقط لمتابعة يوم واحد مظاهرة سلمية
(الكل كان متفق ان المظاهرة هتكون سلمية و ما قرروش انها تستمر غير بعد غباء الامن اللى حصل ليلة 25)
و هل صفحة كلنا خالد سعيد مش كفيلة بده؟؟
::::::::::::
رحيل الرئيس مبارك
اولا
انا متاكدة ان الريس ماينفعش يبقى رئيس لينا تانى
مش هقول اى مساوئ او مميزات ليه
بس يكفى ان الثقة اتعدمت تماما بينه و يبننا و لينا حق فى كده
ثانيا
بالنسبة خطابه العاطفى
اقسم بالله انا لما سمعت خطابه اصلا ماخدتش بالى من الجزء العاطفى اللى فيه لانى و بمنتهى البساطة سمعت الخطاب سمع اختيارى بمعنى انى كنت مستنية اسمع القرارات فقط
هيتنحى ولا مش هيرشح نفسه ؟؟
المجالس ؟؟
و هكذا
و بعد ما خلص ادركت انه ماقالش حاجة عن الطوارئ !!
بكيت عليه ؟
اه بكيت عليه بس بعد الخطاب لما سمعت المكالمات و اخدت بالى من كلامه بس كنت قبلها كونت رايى
هو يستحق البكاء ده ؟؟
الله اعلم بقى
عمل حاجات كويسة
و قصادها عمل بلااااااااااوى
السؤال :الريس يتنحى دلوقتى ولا لا؟؟
انا شايف انه مايتنحاش دلوقتى
لكذا سبب
اولا
التغييرات الدستورية ماحدش من حقه يغيرها الا هو .. هنقول هنكون لجنة .. امتى هتتكون او فى فترة زمنية اد ايه ؟؟
حال البلد خلال الفترة دى هتكون ايه؟
ثانيا
مين هيمسكها
النائب؟؟
طيب المتظاهرين مش كلهم موافقين ع كده
و انا سمعتها بنفسى و اكيد فى اليوتيوب دلوقتى
رافضين تماما السيد عمر سليمان لانه دلوقتى بقى بيمثل النظام اللى هما رافضينه
يبقى لو مسكها النائب البلد مش هتهدى برده !
بجانب
الكل بيقول يتنحى و خلاص الناس هتروح
لا الناس مش هتروح
لان بمنتهى البساطة هيطالبو بمحاكمته و برده تقدرو تسمعوها فيديو
طيب ماهو من حقنا يتحاكم ؟!
مش هتناقش فى الفكرة دى
بس انا شايفة ان اى رئيس محترم لاى بلد محترمة المفروض فى اخر عهده يعمل حاجة زى فكرة كشف حساب بمراقبة الشعب
الفكرة مش هنا .. الفكرة ان دى كلها خطوات مش محسوب زمنها و مش محسوب نتيجتها و اللى بيتكلم مفترض ان الكل هيوافق عليها و ده مش صحيح !
قولولى بقى مين الريس بعده؟؟
و مين الحكومة؟
هنكون حكومة ائتلافية .. ماعنديش اى مانع و الله
بس برده هنرجع للزمن هتاخد اد ايه
هل البلد هتقعد فترة اد ايه مافيهاش حكومة ؟؟ و هل هتستحمل؟؟؟
طيب ما هو كان ممكن الريس يموت كانت البلد هتقع؟
لاااااااااا طبعا .. بس لو مات كانت الخطوات هتبقى معروفة طبقا للدستور
انما دلوقتى
احنا مش راضيين بالدستور
احنا رافضين القيادات اللى موجودة دلوقتى
احنا مش متفقين ع رئيس او حكومة لحد دلوقتى
احنا مش محددين نقطة النهاية .. و مش التنحى .. لان زى ما قلت فى ناس قايلة نقطة النهاية محاكمته
و غير كده احنا مش عاملين حساب انقسام المصالح بعد التنحى (توزيع التورتة زى ما وائل قال)
طيب و المظاهرات
المظاهرات اولا مافيش حد يتكلم بلسان الشباب و ده غلط-من رايى يعنى -
بجانب ان الناس عاوزة قرارات تتنفذ و خلاص
طيب ليه مانتفاوضش
هو تحدى يعنى؟
بجانب
ليه مايتعملش تصويت ع الانترنت و نشوف هل الشعب اللى اكتر من 80 مليون موافق ع ده ولا لا
بجانب عدم الثقة فى النظام
لانه كالعادة وعد .. و عهدنا به انه خلاف لوعوده
بس فى نقطة
اولا
النظام كان مقتنع و لفترة لا تتعدى ايام اننا بنضرب و نسكت
اننا بيضحك لعينا بسهولة
اننا مش هنقدر نتكلم
دلوقتى هو موقن ان ميدان التحرير موجود
ليه مانجربش
و الله و الله و الله مش فكرة انى مش عاوزة حرية كاملة
انا زيى زى اى مصرى
نفسى فى بلد حرة
اتكلم فى الجامعة من غير ماحد يقولى بلاش كلام فى السياسة
اقول رايى فى كل حاجة و اتسمع
تليفزيوننا يبقى ليه مصداقيته و اصدقه مرة فى حياتى
نفسى يبقى فى مشروع قومى الحكومة معرفانا بيه و الشعب كله بمختلف طوائفه يشتغل عليه
نفسى اى حد ياخد اى حاجة من البلد يبقى مستحقها
نفسى فى حاجات كتييييييير
بس ماينفعش يخلينى ابقى مندفعة او كله يحصل مرة واحدة
حقنا ؟ .. اه حقنا و نستحق اكتر من كده
بس انا لانه مش معانا فلما اخده صعب اخده كله
الحرية ليها ثمن غالى ..
اه الحرية ليها ثمن غاااااااالى جدا و لازم يتدفع .. بس اى موقف لازم تتحسب كويس ايجابياته و سلبياته
لو السلبيات غلبت يبقى ده مش ثمن دى تضحية
و الحرية ليها تمن (حتى لو تضحية بحاجات و اشخاص) بس ماينفعش تكون كلها تضحية
طيب ايه السلبيات
السلبيات كل المخاوف اللى انا قلتها فوق
احتمالية المؤامرة (و احنا مش حاسبين نتائجها اصلا)
الناس مش متفقة ع حاجة
و ... (الكلام اللى قلته فوق كله)
طيب و الشباب اللى راح نسيب دمه
لااااااااا طبعا
بس هل ده مبرر انى ازود فى الخساير ؟؟
هل لما اخويا يتقتل ده مبرر انى انتقم بدون حساب العواقب كويس؟؟
:::::::::::::
و أخيرا
اقسم بالله الموضوع ده مش هدفه نهائى انى اقنع حد بكلامى
كل هدفه انه يكون حاجة زى عصف ذهنى ع الاقل ليا
ع الاقل عشان ازود نسبة اقتناعى بالحاجة اللى بقولها
او اغير رايى للافضل
بعتذر جدا لو فى اى كلمة ضايقت اى حد فيكم(اكيد مش قاصداها)
::::::::::::
اللهم احفظ مصر و شعبها و شبابها
اللهم ارحم شهداء مصر
اللهم صبر أهلهم .. اللهم صبر أهلهم .. اللهم صبر أهلهم
اللهم ارنا الحق حقنا و ارزقنا اتباعه و ارنا الباطل باطلا و ارزقنا اجتنابه

16 ضع بصمتك ..:

lolo يقول...

رائع يا شموخ اتفق معاكى تماما

شموخ مسلمة يقول...

lolo
نورتى المدونة
و ربنا ينور بصيرتنا كلنا و يهدينا للصح

إنسان || Human يقول...

أول نقطه بتاعة موضوع البلطجية والجمال فعلا زي ما انتي بتقولي تدعو للشك ولكن انت ما خدتيش بالك ان النظام بتاعنا في منتهى الغباء والتخبط وغير منظم ابدا في قراراته
الموضوع اللي حصل ده عمله شوية بلطجية بدافع من رجال اعمال واعضاء في نفس الوقت متخيلين بغبائهم ان هما كده بيخدموا النظام ... مدفوعين برغبتهم العمياء والأولى في الابقاء على مقاعدهم لأنهم ببساطة حسوا بالخطر وكانوا متأكدين ان هما لو مافضوش المولد ده
هايطيروا على طول ويضيعوا وده اللي حصل بعد كام يوم و رؤوس الحزب طارت على رأسهم الشريف وجمال وقبلهم عز
وهي دي ببساطة اللغة الوحيدة اللي بيفهموها العنف والبلطجه
فاكره اللي الانتخابات
...
طيب اعملي بحث عن اخبار الوادي الجديد في جوجل ... توصفي بإيه اللي حصل هناك امبارح مؤامرة برضه عاملها المره دي الامن ضد النظام ...ببساطة النظام بيقول حاجه وبيعمل حاجه تانيه خالص
بيثير الناس لتجبره المتمادي متخيل ان من كتر الناس ما سكتت مش هاتثور وتعترض
------------

إنسان || Human يقول...

بخصوص فكرة اسرائيل
انتي كنت عايزهم يردوا يقولوا ايه
ايه رد الفعل اللي انت عايزاه
يقولوا ايه مثلا
ان اسرائيل مع ارادة الشعب المصري
وده تعتقدي ممكن يتفهم ايه
طيب ناس مستريحة وحاطه في بطنها بطيخه صيفي وبقالها 30 سنة او اكتر في أمان يدخلوا نفسهم في متاهات ليه ...طبيعي اي فوضى عندنا هتأثر غصبن عنهم على أمنهم
يحتلونا مثلاً ...على اساس ان ما فيش جيش في البلد يعني
الجيش مش ضد الناس ودي حاجه تتحسب لأمن البلد, لأن اي ضرر هايحصل للبلد هاتلاقي الناس كلها وقفت ورا الجيش ... وجيشنا مش جيش تونس ولا جيش لبنان ده من أقوى جيوش المنطقه ...ان ما كانش بالعتاد يبقى بالعدد
طيب ..تقولي ايه عن تعليق الايرانيين ونصر الله
هما كمان بيتأمره لفوضى وخراب لمصر..؟؟؟
هو الموضوع ان كل يغني على ليلاه من الأخر ...؟
------
موضوع خالد سعيد
والصفحة ووائل غنيم
الراجل اعتقد وهو قال كده ان زعل وحزن كتير عشان الناس اككتشفت هويته ...الراجل مش عايز يكون بطل من الأخر
طيب انا عايز اقولك حاجه تانيه دي مش اول مره تحصل ويتم تفعيل مظاهرات واضراب في مصر كلها عن طريق النت والفيس بوك اه
6 ابريل ..على الفيس بوك برضه دعوا الى اضراب في مصر ومظاهرات وفعلا حصل الموضوع وتم وده ظهر اكتر في مدينة المحلة الكبرى ...وتم القبض على اسراء عبد الفتاح فاكراها ...وتم توجيه ليها نفس الاتهامات انها مموله من الخارج و عايزه تقلب نظام الحكم ...مش كده
لكن الموضوع المره دي كان دافعه اكبر
تعذيب الشرطه وتعسفها
تزوير انتخابات ...كل ده مش نتاج يوم واحد لاء ..ده تراكمااااات
-----
http://www.syria-news.com/readnews.php?sy_seq=128090
ده رابط يوضحلك النشطاء المصريين كانوا بيدخلوا على النت ازاي
مش الحاجه المستحيله اللي تخلينا نشك للدرجه دي ...احنا على فكره مش فقهاء في النت لدرجة ان احنا نجزم ان لا يوجد الا طريق واحد لدخول االنت
اكيد في ثغرات لا يعلمها الا المتخصصون
وافتكر ان جوجل اتاح طريقه لدخول النت عن طريق الاتصال التليفوني تاني يوم على طول بعد ما قطعوا النت
وما ضحكش عليكي انا ماجربتهاش
بس هما اعلنوا عنها وشفتها في نشرات الاخبار

إنسان || Human يقول...

بخصوص وائل غنيم
هو بكى ليه أصلاً ؟؟؟؟؟
هاه ردي
ايوه بكى لأنه حس بالذنب اتجاه الناس اللي ماتت واتصابت واعتقلت ...ماتت في المقام الأول ماشي ...بفرض ان هو كان من اوائل الناس اللي دعت لتلك الفكرة اللي هي المظاهرات
اذن هناك دافع قوي وحقيقي مش زي الريس
هو احنا اتعاطفنا مع الريس ليه
لما قال عايز يموت على ارضه ..وماله مايموت ..بس معلش ماينفعش واحد عمال يغلط ويعمل بلاوي وجاي يفتكر دلوقتي ان هو نفسه يموت على ارضه ...غلطت لازم تتحاسب ...
المقارنة بين وائل مشي والريس ما مشيش
مافيش اي وجه للمقارنه اصلا انت بتقارني بين ايه اصلا
ده رئيس بقاله تلاتين سنه ودافعه الوحيد عناده ..وكبريائه وطظ في الشعب
وده شاب في برنامج تأثر بصور شباب حس للحظه بالذنب اتجاههم في حين اللي السبب في موتهم اللي هو الريس ...ولا في دماغه ولا حتى اشار لهم في خطابه و لا قدم تعزيه
مش عارف مثلا ..دي كارثه
طيب انتي ليه اصلا تفترضي ان يكون في نتائج سلبيه لما الريس يمشي ؟؟؟؟
هو الريس هايمشي وياخد الجيش معاه ولا ايه ؟؟؟؟
هي العمليه سايبه للدرجه دي
.......
شبكة رصد هي اذا كنتي لا تعلمين هي امتداد لصفحة برلمانيات وكانت بترصد برده اي مخالفات من عنف وبلطجه في الانتخابات والناس قالت ان في مظاهرات هاتحصل في نفس الوقت في كل محافظات مصر ..نعمل صفحة تانية لأن الصفحة على الفيس لما بيزيد عددها عن حد معين ..لا يجوز تغيير اسمها وطبعا هايكون في تعارض بين حدث المظاهرات وعنوان الصفحة اللي هو برلمانيات فعملو صفحه جديده خالص
سموها رصد عشان تغطي حدث كبير هايحصل في كل مصر زي ما حصل قبل كده في ستة ابريل واتعملوا صفحات موجوده لحد دلوقتي...وده طبيعي جدا ان في صفحات بتتعمل كل يوم عن احداث هاتحصل
عندك مثلا عملوا صفحة للبحث عن وائل غنيم مع ان وائل غنيم اختفى لمدة 12 يوم بس ...وصفحات اللي بتتكلم عن تزوير الانتخابات برضه اتعملت مخصوص
ايه المشكله يعني لما يعملوا صفحة لحدث حتى لو كانوا متخيلين ان هو هايستمر ليوم واحد ...وعند صفحات بالهبل بنفس النظام كده
المراسلين والصور بقه ...موضوعها كالآتي مبدأ الصفحة دي ببساطه يقوم على ان احنا اللي بنرصد ...يعني حاجه مش رسمية وناس بتقبض فلوس على ده وكده ...يعني مش زي الجزيرة مثلا ...دي صفحة ليها اميل واللي عند صورة أو فيديو أو خبر يبعتلوهم او يكلمهم على ارقام تليفونتهم اللي كانت معلنه ...
وبعدين هي الحاجات اللي على الصفحة دي اخترعوها ..ما هي واقع موجود وهما بينقلوه بس ...ببساطه

إنسان || Human يقول...

نقطة تنحي الرئيس
مافيش حاجه اسمها كده خالص هو لو عايز يغير الدستور هايغره من بكر بقرار ويشكل لجنه تعدله او اتغيره بالكامل ... ويحل البرلمان كله بقرار ..وبعدين في حاجه اسمها شرعية الثورة ...يعني ثورة تقوم تلغي الدستور اللي فات مالناش دعوة بقة بالدستور القديم ولا هي ملزمة بقنوات شرعية لتغييره ...وهذا ما حدث في ثورة يوليو جاءت
لغت الدستور القديم ووضعت دستور جديد ..ودول بقه حبة ظباط ده كمان غيروا نظام حكم من ملكي لجمهوري ...مش زي دلوقتي
وبرضه انا متأكد ان نفس الكلام اتقال باستحالة تغيير مصر من نظام ملكي من ايام محمد علي .انتي متخيله مش 30 سنه
جاءت الثورة وكنست كل النظام السياسي من أول الملك لحد الأحزاب والدستور والعك ده كله ..البلد ضاعت وراحت في داهية!!!!!!!!!!
المطلب الاساسي الأن هو رحيل الرئيس وتنحيه ..وده متفق عليه الجميع
بعد مايمشي نتحاور ونتشاور على الخطوات لإكمال التغيير المراد
النظام اساسه الرئيس ...باعتقادي بزواله النظام كله هايقع
انا متفق معاكي ان المعارضه والشباب مش مجتمعين على شئ معين ..الا حاجه واحد وهي تنحي الرئيس
لا يوجد ضمانات لإجراء الاصلاحات المطلوبة في الفترة القادمة اذا كمل الرئيس حكمه للأخر بل بالعكس ... النظام كبرياءه جرح وهاينتقم انتقام شديد اذا فض الناس تظاهرهم ...وده حصل قبل كده في عهد السادات لما لم الناس عاطل على باط ل في اواخر عهده بعد ثورة الجياع ومصر شافت ايام سوده ساعتها الناس كلها اتسجنت فمابلك الريس بتاعنا اللي اتجرس قدان العالم كله في التحرير ؟؟
وايضا لا يوجد ضمانات اذا تنحى الرئيس ان يكتمل الموضوع كما نريد ... احنا مشينا في طريق يانكمله للأخر يا نكمله للأخر لا يجوز ابدا الرجوع فيه ..وهي عمليه صعبة ومش سهلة ...وربنايعديها على خير

شموخ مسلمة يقول...

Hu-man

بالنسبة للبلطجية:
*اظن ان نظامنا كان مستضعفنا اكتر منه غبى .. فماظنش انه يشغل غبائه بعد يوم من الخطاب اللى هو اصلا اكبر دليل هزيمة النظام
و زى ما حضرتك قلت رجال اعمالو ناس خايفة ع مناصبهم و ناس بتخدم النظام
بس مانقدرش نقول النظام
زى ماحنا رافضين ان يتقال ع اى شاب خرب يا افندم ماينفعش ننسب لاتهمة للنظام
ازاى متخيل ان الناس مش هتثور و اصلا الناس ئائرة لوحدها !

:::::::
بخصوص اسرائيل
*انا اقتنعت بوجهة نظر سموالامير فى الجزئية دى الا و هى خوفهم من الاخوان لان ده احتمال اقوى ..
اما بالنسبة للجيش
انا متفقة مع كلام حضرتك جدا ان جيشنا من اقوى الجيوش الحمد لله
بس السؤال يا افندم حضرتك مطمن ان جيشنا قوى .. و هل اصلا جيشنا دلوقتى فى مكانه عشان يبقى يحمينا من الاحتلال؟؟
اما بالنسبة لحزب الله و ايران
فمصر دلوقتى من نظر ناس كتير تورتة و زى ما قال وائل عاوزين يقسموها
سواء الناس دول خارجيين او داخليين

:::::::
بالنسبة لموضوع صفحة خالد سعيد
الديال اب .. انا ماقتنعتش بيه لان خطيب اختى مهندس اتصالات (شبكات) و المفروض ان ماكنش فى نت فلما اتكلم انه ديال اب ماقتنعتش انما لما شفت الخبر انتهت الجزئية دى بالنسبة لى

اما بالنسبة لوجه المقارنة فانا ماقارنتش المقارنة دى شفتها ع الفيس من ناس كتير فبرد عليها مش بأيدها

فكرة السلبيات لما الريس يمشى انا ماقلتش هياخد الجيش بس انا وضحتها فى الموضوع

اما بالنسبة لشبكة رصد فانا فعلا ماكنتش اعرف انها امتداد لصفحة تانية .. و لما عرفت انتهى الشك اللى جوايا بالنسبة لها الحمد لله

:::::
اما بالنسبة للتنحى

طيب حضرتك بتقول لو عاوز يحل البرلمان بقرار و الدستور بقرار و الشباب عاوزينه يتنحى
حضرتك ممكن تقولى وصف بلد مالهاش رئيس و برلمانها مش موجود و مالهاش دستور؟؟؟؟؟؟
و ممكن برده حضرتك تقولى لو اتنحى الريس دلوقتى او النهاردة ايه الخطوات بعد كده بس بالزمن ؟؟؟
مش قادرة اتخيل يعنى ايه لما يمشى هنتفق ع الخطوات
دى الحاجة الاساسية اللى مخليانى مش عاوزاه يتنحى
هنتفق ازاى ؟ و يمن هيتفق مع مين؟ و فى زمن اد ايه؟ و هنحمى البلد من اى حاجة خارجية فى الوقت ده ازاى؟ و الجيش موقفه ايه بعد التنحى؟ و ايه الضمان ان كل الشباب هيمشى بمجرد اعلان تنحيه؟ و لو مامشيش الكل هيمشو ازاى و باى طريقة؟؟
و الزمن مهم جدا فى كل خطوة و ده اللى مش لاقياه فى كلام اى حد من مؤيدى اكمال المظاهرات .. انا نفسى تكمل فى حالة واحدة
ان الخطوة اللى بعدها محسوبة

برده مش فاهمة يعنى ايه مشينا فى طريق يا نكمله يا نكمله
طيب ما نعالج لو فى سلبيات عشان لما نكمل نكمل صح
لان لو كملنا غلط الله اعلم بالنتيجة
مافيش ضمان بوعود الريس و مافيش ضمان
ايه بقى السبب اللى يخلينى عاوزة المظاهرات تكمل؟؟؟

شرفنى مرور حضرتك

mallouk يقول...

اللهم عجل من عندك بنصر عزير يارب
اللهم انصر المستضعفين في كل مكان
هذا ما يمكننا فعله
الدعاء
تحيتي ومودتي

شموخ مسلمة يقول...

mallouk

اللهم اميييين يااااارب

شرفنى مرور حضرتك

عبد الرؤوف بن عبدالسلام (أبوهارون) يقول...

متى سيطلع علينا مبارك ويقول لنا «فهمتكم» على طريقة المخلوع بن علي..؟

شموخ مسلمة يقول...

amiralcafe

ثم ..؟؟؟!

شرفنى مرور حضرتك

Unknown يقول...

http://islam-nogodbutallah.blogspot.com/2011/02/blog-post_09.html

Unknown يقول...

السلام عليكم

أختي شموخ..
بالنسبة لمؤامرة بلطجية الجِمال.. فتفسير الأمر فعلا بسيط.. حتى يميل معظمنا إلى الرئيس لم يأمر بهذا لأنه بالفعل ليس بهذا القدر من الغباء لينسف الجولة التي كسبها بدرجة كبيرة من النجاح (لعبة الخطاب العاطفي إياه)، لكن أغبياء نظامه هم الذين فعلوها ببساطة في محاولة أخيرة لعدم انقلاب الطاولة عليهم (وهو ما حدث فعلا مع بعضهم).. وقد تم الإمساك بعدد لا بأس به من هؤلاء البلطجية واعترفوا...!

بالنسبة لموضوع صفحة خالد سعيد إياها.. صراحة لستُ معنيا أصلا بالحديث فيه لأني أراه لن يغير شيئا من الواقع الماثل هناك في التحرير.. واقع المليون الذين صاروا يجتمعون يوميا تقريبا..!!

بالنسبة لموضوع الرحيل وإصرار النظام على الإيحاء لنا (وهو ما اقتنع به الكثيرين) بأن كارثة مزلزلة وطامة كبرى ستحدث إذا رحل الرجل فورا.. يا أختي الكريمة.. إن نظاما ينهدم بسبب اختفاء رئيسه لهو نظام فاشل لا يستحق البقاء أصلا.. لكن ماذا بعد مبارك..؟
الإجابة - التي أقتنع بها تماما - ستجدينها في هذا الرابط:

http://www.facebook.com/note.php?note_id=10150089470730967&id=608899456

تحياتي أختي الكريمة.

الموسوعة الحرة يقول...

تحية طيبة...
سررت بزيارة المدونة الجميلة وقراءة ادراجاتها المتنوعة...
دمت بخير...

شموخ مسلمة يقول...

واحد من الناس ,, أ\ماجد

مازلت مالقتش الاجابة ع اسئلتى .. قريت المقالين
حتى مقال حضرتك يا استاذ ماجد الكلام مش محددو مش مُتفق عليه
يارب اكون انا غلط ياااااااااارب
لان خلاص الرئيس تقريبا هيتنحى خلال ساعات
و مافيش ادامنا كلنا غير الدعاء ان يكون ده الخير فعلا
ياااارب يحفظ مصر و ينصرها
و يحفظ شبابها و شعبها

اميييين

شرفنى جدا مرور حضراتكم

شموخ مسلمة يقول...

openbook

انا اسعد يا افندم بمرور حضرتك