الأربعاء، 6 أكتوبر 2010

اكتوبر 2010


السلام عليكم و رحمة الله

كل سنة و حضراتكم طيبين

6 اكتوبر .. يوم النصر , يوم العزة و الكرامة و الشموخ

يوم مصر فقدت فيه اغلى اولادها و هما فرحانين اوى و هى فرحانة بيهم اوى اوى اووووووووووى

و احنا كل سنة فى نفس اليوم بندعيلهم بالرحمة و نقول ياريتهم يبقو موجودين دلوقتى و ياريتنا نكون زيهم

انا اكيد مش هتكلم ع اكتوبر و نصر اكتوبر اللى ذل الصهاينة

و لاهتكلم ع حال مصر ولا حالنا ..


بس

سؤال -قد يكون غريب- قعدت اتخيل اجابته ماعرفتش

يا ترى الحرامى اللى بطل سرقة فى الفترة ى عشان مصر لو شاف مصر دلوقتى احساسه هيكون ايه؟

و يا ترى الشهيد لو شاف حال مصر دلوقتى هيقول ايه؟؟

و يا ترى اولاد الشهداء بيقولو ايه؟؟

و جنود اكتوبر اللى ربنا ماكتبلهمش الشهادة يقولو اييييييييييييييه؟؟

و اخيرا .. نفسى بجد اتخيل هو الرئيس احساسه ايه .. كل يوم فى نفس السنة .. يقعد ع كرسى و يتفرج ع عرض بيمجد فى نصر اكتوبر اللى هو شارك فيه عشان مصر .. و دلوقتى هو موجود و السلطة الاولى - ع المستوى المحلى - و مصر حالها ايه؟؟؟؟؟؟

عاوزة اقول حاجة اخيرة ..

مصر فى احوج ما يكون لينا احنا شباب النهاردة مش شباب 73
شباب 73 نصروها
لو ماعملناش حاجة لبلدنا يبقى مانستاهلش نحتفل بيوم نصرها
لاننا لا شاركنا و لا بنشارك .. يبقى بنتطفل ليه ع هدف اتحقق من ناس تانيين

نصر اكتوبر يوم فى كل سنة عشان يفكرك ان حلمك تقدر تحققه
و ان مهما كان الظروف حواليك هتحققه -مادام معاك ربنا ثم عزيمتك-

كتير مننا بيقول مصر محتلة دلوقتى -داخليا- و حتى لو فهى كانت محتلة بجد قبل 73
لو ماقدرتش تحرر بلدك
ع الاقل
حرر نفسك انت من الذل عشان بعد كده تقدر تعمل حاجة للبلد دى ..

تعالو نحلم لبلدنا بمستقبل افضل بينا .. بتقدم .. بتطور
مافيش حاجة هتمنعنا من حلمنا
-لا جوه و لا بره-
بس احنا نحلم و نحط هدف لبلدنا احنا اللى نحققه
ايه رأيكم
كل واحد فينا يكتب هدف و يكون ده لمصر
مش لفلوس
و لا شهرة
و لا اى حاجة خااااااالص
لمصر و بس




3 ضع بصمتك ..:

rack-yourminds يقول...

بالفعل ما احوجنا الان الي روح وارادة وعزيمة اكتوبر لكي نغير من احوالنا الي الافضل ,وبالفعل جيل اكتوبر ادي ما عليه, فمذا قدمنا نحن ؟
_________
اتمني ان تصبح مصر دوله متقدمه لا تقل تقدما عن اوروبا وامريكا

الظل يقول...

كل سنة ومصر كلها طيبة

فعلا عند حضرتك حق

يا ترى الناس دى لو موجودة والموجود منهم بيقولوا ايه ؟؟

غير معرف يقول...

محتاجين نعمل زي اليابانيين

قرأت ان المواطن الياباني بيعمل 9 ساعات بدل 8

ال 8 ساعات الأساسيين ليه
والساعة الزيادة من أجل اليابان

محتاجين نعمل حاجة بجد