السلام عليكم و رحمة الله
حصل معايا موقف فى رمضان .. كنت بسمع اناشيد عن فلسطين و كده و بالادق "هزتنى نسمات الليالى"
فماما بتحكى لواحدة قريبتى عن الماساة اللى اسمها شموخ-و ربنا يعينهم عليا-
-مشكلة ! .. اناشيد تقطع القلب .. و مواقف و مناظر و نكد
- يااااااه لا انا ماستحملش كده .. انا لو شفت الحاجات دى بعيط و مابعرفش انام خالص!!
استوقفتنى بقى الجملة بتاعة قريبتى دى
اصلها مش جملتها لوحدها .. ده لسان حال اغلبنا
انا قلبى مابيستحملش اللى بيحصل فى فلسطين !! ياحرام ربنا معاهم
و شوية ماهما اللى باعوها !!!!!!!
مش عارفة
انا كان نفسى اسالها انتى ليه فاكرة نفسك بتعيطى لفلسطين
لا
انتى بتعيطى لمنظر قاسى شفتيه
زى مابتعيطى ع فيلم رومانسى
زى ما بتعيطى ع اغنية هايفة
زى و زى و زى
زى حاجات كتير بنعيط عليها
بس عمره ماهيكون عياط ع شعب بيتقتل
ع اخواتنا اللى بيتقتلو
و اطفالنا اللى بيتدبحو
لالا
استحالة نعيط ع حالهم و تطلع مننا التصرفات اللى بنعملها و كم الهيافة اللى بقى بيجرى فى دم معظم الشباب -و فى نسبة كبيييييرة الحمد لله لسة بخير-
و الله يا جماعة كنت فى يوم قاعدة مع ماما و اختى الكبيرة
انا قلت لماما موقف واحد
ماما .. انتى متخيلة بنتك العروسة الجميلة اللى انتى مستنية فرحها و يوم فرحها و انتى واقفة جنبها و فرحانة تموت ادام عينك برصاصة غدر و انتى مش عارفة تعملى ايه
و انتى شايفة اخواتك المسلمين ياعينى بيعيطو
احساسك هيكون ايه
بنتك ماتت ادام عينك و هى لابسة فستانها الابيض
لا تتخيلو رد فعل ماما يومها
هى اه بتتاثر باللى بيحصل فى فلسطين و بتعيط ع اللى بيحصل هناك و بتدعى ربنا و ده كله شئ جميل و الحمد لله ان فى مشاركة مننا بكده
بس لما حست ان الموضوع حصلها
لا
كان تاثير تانى خاااااااااااااالص
انا مش عارفة هو احنا فعلا لما بنتكلم ع فلسطين حاسين احساس ناس فى بلدهم مهددين بكل حاجة و ابشع حاجة
بحاول أتخيل احساس الطفل اللى والده بيموت ادام عينه او العكس
او الانسان اللى ممنوع انه يحلم لان وطنه محتل
مابقدرش !!
هو احنا ليه متخيلين اننا ناس نقية اوى و حاسين باللى بيحصل فى فلسطين و كل اللى مانعنا حكامنا
فوقو يا جماعة بلاش نضحك ع نفسنا
تعالو نجهز نفسنا لليوم اللى هنحارب فيه
الله يكرمكم
احنا لينا دورنا
دورنا تجاه فلسطين مش دعاء و بس
ولا دمعة و خلاص
لو مش هتحارب جهز نفسك تكون اب للى يحارب
للطفل اللى هيتربى عزيز و عارف يعنى ايه اسلام و كرامة امة و نصرة دين و استرداد وطن
احنا مش مستعدين نحارب -طبعا الا من رحم ربى-
انا هقولكم ع موقف يمكن يوضح قصدى اكتر
اخويا الصغير فى تانية ابتدائى فى رمضان السنة دى
جالى
-أبلة شموخ.. عطشااااااااااااااااااااااااان مش قادر
تعباااااااااااااان عاوز اشرب
-احمد حبيبى مش انت صايم لربنا
-اه
- طيب استحمل يا حبيبى معلش عشان ربنا يحبك و تدخل الجنة
- بس انا مش قادر و عطشااااااااااااان اوى و تعبان
-احمد .. انت هتعمل ايه لو وقفت ادام الاسرائيليين
-هقطعهم .. هقتلهم
-طيب لو كنت عطشان هتسيبهم و تروح تشرب و لا هتقتلهم ؟؟
- لا هستحمل و اقتلهم كلهم كلهم و مش هشرب خالص لحد ماقتلهم كلهم
-طيب يا حبيبى ربنا بيدربنا ع حرب اسرئيل بالصيام .. عشان انت لو ماقدرتش تستحمل دلوقتى مش هتقدر تستحمل و انت بتحارب اسرائيل .. صح؟؟
-ااااااااه صح .. انا مش عاوز اشرب
انا عاوزة اقولكم ان اخويا يومها و الله كمل صيام و مانامش طول النهار
لسبب واحد
انه حط فى دماغه انه بيجهز لحرب اسرائيل ..
الرسالة وصلت؟؟؟
ع فكرة يا جماعة كلامى -اقسم بالله- موجه ليا قبل اى حد
بس اللى انا عاوزة اقوله
اننا امة مختلفة عن اى امة تانية
احنا امة مسلمة
و مش هننتصر الا بقوانين نصر الله لأمة الاسلام
"نحن قوم أعزنا الله بالاسلام فإن ابتغينا العزة بغيره اذلنا الله"
هتعملو ايه؟؟
كل واحد عارف هو قادر يعمل ايه
د\عبد الكريم بكار ليه مقولة جميلة اوى
"لا يمكن أن يكون هناك مجتمع أقوى من مجموع أفراده؛ولذا فالنهوض بالذات هو مساهمة مقدَّرة في نهوض الأمة"
كده الموضوع واضح جدا
بتتاثر باللى بيحصل فى فلسطين اعمل حاجة
اى حاجة لنصرة امتك
انما لو على الكلام
كلنا قادرين نتكلم ليل و نهار
و نسمع اناشيد عن فلسطين
و نعيط
بس مش كلنا بنعمل
و ده سبب ازمتنا
و اخيراااااااااااا
يا أمتى أين الهمم
أين التسابق للقمم
قد أحرقتنى لظى الحمم
ما عاد يطربنى الغناء
ولا الكلام عن القدم
أقسمت أن يا أمتى
أن تعتلى عرش الأمم
7 ضع بصمتك ..:
لازم كل واحد فينا يبتدى بنفسه ويصلح منها
لو مش هنقدر نجاهد نفسنا هنجاهد اليهود ازاى ؟؟
اللهم انصر الاسلام وأعز المسلمين
كثيرا ما اشعر بالحزن والضيق وفقدان الأمل ,وبطبيعة الحال هذا بسبب الأنبطاح والأستسلام العربي للقوي التي لا تريد خيرا للعرب وللمسلمين ,ولكن يتسرب داخلي شعاع من الأمل حين أري أن سماء الأمه ليس سواداً كله ,فثمة أضاءه وحيده في سماء الأمة مازلت تعطينا الآمل في قدراتنا وامكاناتنا,هذه الأضاءه هي :المقاومه العربيه في فلسطين ولبنان والعراق
فتلك المقاومه هي ,كما يقول الاستاذ فهمي هويدي ,الاضاءه الوحيده في سماء الأمه.
سيدتي ثمة دول اسلاميه أخري بطلت كلام مثل ايران وتركيا ,انظري الي النفوذ الايراني والتركي سواء في الساحة العربيه او الاسلاميه او الدوليه
ومفيش شك ان صعود تركيا وايران افاد الأمه الاسلاميه ,انظري الي الدعم الكبير الذي تقدمه ايران لحزب الله العظيم ولولا فضل الله ثم احتضان ايران لحزب الله لكان قد تم رسم خطة الشرق الأوسط علي هوي اسرائيل وامريكا,انظري ايضا للدعم العظيم الذي تقدمه تركيا الي فلسطين .
سيدتي اتفق معكي بأن النصر لا يتأتي الا ببناء الفرد علي تعاليم الأسلام
فالفرد هو لبنة هذه الأمه
__________
حقيقةً اتأثرت بقصتك مع اخيكي ,بارك الله فيكي علي مواضيعك الهادفه دائما
الظل
اللهم امين ياااااارب
ربنا يجعلنا سبب فى نصرة أمتنا يارب
بغض النظر ع ايران لانى مش من مؤيديها نهائى صراحة ..
بس انا متفقة مع راى حضرتك جدا فى تركيا بجد دولة تُحترم دولة عارفة ازاى تعمل لنفسها كرامة و تفرضها ع غيرها و تبنى حضارة
بجد ربنا يكرمهم و عقبال مصر و كل الدول الاسلامية و العربية يارب
كمان فى امل بينا بجد - ع مستوى الافراد- انا الفترة الاخيرة يمكن اخر سنتين تقريبا بتعامل مع ناس بجد ربنا يبارك فيهم يارب و يحميهم و يجعلنا و اياهم سبب فى نصرة الاسلام
شرفنى مرور حضرتك
نحن قوم أعزنا الله بالاسلام فإن ابتغينا العزة بغيره اذلنا الله
فاكرة انا المدونة القديمة كان مكتوب عليها من فوق الجملة دي
و بجد حساها اوي
شوفي حال المجتمع دلؤتي ،، همه تيمو و انه اخد جايزة ايه
فعشان كده ده بقي حالنا!!
ربنا يصلح حال شباب الامة و يهدينا
تحفة يا شموخ
و بجد بجد من زمان اوي ما قرتلكيش حاجة و ما تهتش وسطها :)
جزاكي الله خير علي التذكرة
و اديني بعدي اسلم اهو بدل ما بتقولي عليا ما بسلمش :)
نحن قوم أعزنا الله بالاسلام فإن ابتغينا العزة بغيره اذلنا الله
المدونة القديمة كان مكتوب عليها الجملة دي من فوق ، كانت اول مرة اقراها فيها بس من ساعتها و هي لازقة في دماغي
و في اي وقت بشوف حالنا فيه بفتكر الجملة دي
سلمت يداكي يا شموخ
جزاكي الله كل خير علي تذكرتنا :)
ربنا يصلح حال شباب الامة
علي فكرة بجد و بكل صراحة ما تهتش في النص :)
ZakZoka
احم ..
يابنتى ماحنا قلنا بقى نبطل عيشة الغازات دى (فاهمانى طبعا)
بعدين ايه ده سيادتك هو انا كنت لسة نقطة التتويه دى معايا
ياللا تعيشى و تتوهى ياقلبى فى تدويناتى بس طبعا
انما فى الحياة ماتتوهيش ابدا يارب
نورتينى يا قمرى
و جزاكى كل خير
إرسال تعليق